Որքան մոտենում է քվեարկության օրը, Ռուսաստանն ավելի ու ավելի է սաստկացնում սպառնալիքները. փոխվարչապետ Օվերչուկն այսօր արդեն ուղիղ ընդգծել է կապը ընտրությունների հետ՝ զգուշացնելով, որ ըստ դրանց արդյունքների էլ Մոսկվան որոշում կկայացնի.
«Եթե եվրոպամետ ուժերը հաղթեն, դա նշանակում է, որ Հայաստանը շարժվում է դեպի Եվրամիություն։ Եվ այդ դեպքում իսկապես անհրաժեշտ կլինի համապատասխան միջոցներ ձեռնարկել: Ինչո՞ւ պետք է աջակցենք նման երկրի։ Մի՞թե մենք պետք է փող տանք նրանց, ովքեր վաղը հնարավոր է պատերազմեն մեր դեմ», — հայտարարել է Օվերչուկը։
Ռուս բարձրաստիճան պաշտոնյան այսօր կրկին հիշեցրել է գազի հնարավոր թանկացման վերաբերյալ Երևան ուղարկված նամակը՝ զգուշացնելով, որ Հայաստանը ստիպված կլինի ստանալ նույն ռուսական գազը, բայց արդեն մեծ մաքսատուրքերով ու միջնորդավճարներով.
«Հետևաբար, իրավիճակը Հայաստանում շատ դժվար կլինի։ Մենք դա չենք ուզում», — նշել է ՌԴ փոխվարչապետ Օվերչուկը։
Ռուսաստանի այս հայտարարություններից ժամեր առաջ Ազգային ժողովի նախագահ Ալեն Սիմոնյանը ուղիղ դիմում էր Մոսկվայի գործընկերներին.
«Բարեկամական խորհուրդ տալ, որ էն գործելաոճը, որ իրենք որդեգրել են, չի աշխատելու Հայաստանի Հանրապետությունում և հակառակ ազդեցություն է ունենալու։ Կոչ եմ անում իրենց՝ չկրկնել նույն սխալները, որոնք իրենք արել են անցյալում։ Եվ ակնհայտ է, որ Հայաստանի Հանրապետությունը չի գնում սրացման, էդ ցանկությունը չունի, բայց միևնույն ժամանակ Հայաստանի Հանրապետությունը իր հարցերը լուծելու է և կլուծի տնտեսական առումով, եթե այս պատժամիջոցները շարունակվեն»։
Ավելի հեռուն գնալով՝ խորհրդարանի խոսնակը պնդում էր, թե այսպես Ռուսաստանի իշխանություններն էլ ավելի վատ են հայ ժողովրդին տրամադրում իրենց դեմ, իսկ դրանից Հայաստանի իշխանությունները չեն տուժելու.
«Լեռնային Ղարաբաղում տեղի ունեցածից, խաղաղապահների գործողություններից և աշխարհաքաղաքական տարբեր զարգացումներից, ռուսական հեռուստաալիքների լկտիությունից հետո Հայաստանի Հանրապետության ժողովրդին իրենք վանում են իրենցից։ Եվ այս քայլերը վանելու են ոչ թե հայկական իշխանությունից, որովհետև Հայաստանի Հանրապետությունում իշխանությունը ձևավորում է ժողովուրդը, այլ՝ վանելու են այդ բաներն անողներից։ Եթե իրենք կարծում են, որ ելակ և մնացածը սահմանափակելով՝ իրենք հայաստանյան իշխանություններին վնաս են տալու, դա այդպես չէ, իրենք վնաս են տալու միայն հայ-ռուսական հարաբերություններին», — հայտարարել է ՀՀ Ազգային ժողովի նախագահը։