ՌԴ Անվտանգության խորհրդի նախագահի տեղակալ Դմիտրի Մեդվեդևը հայտարարել է, որ Լեհաստանի նախագահ Կարոլ Նավրոցկու նստավայրը՝ Բելվեդեր պալատը, կառուցվել է ռուսական կայսերական գանձարանի միջոցներով, հաղորդել է РБК-ն։
«Այո՛, այո՛։ Ռուսական փողերով։ Ուստի արժեր մտածել, որ մեր երկիրը հայց ներկայացնի պալատն օտարի ապօրինի տիրապետումից բռնագրավելու մասին (rei vindicatio) նորահայտ Rzeczpospolita-ից», — հավելել է նա։
Այս կերպ է Մեդվեդևը մեկնաբանել Լեհաստանի գլխավոր դատախազության հայցը, որով պահանջվում է պետությանը փոխանցել այն շենքը, որտեղ նախկինում գտնվում էր Ռուսաստանի՝ Գդանսկում փակված գլխավոր հյուպատոսարանը։
Բելվեդերը Լեհաստանի նախագահ Կարոլ Նավրոցկու պաշտոնական նստավայրերից մեկն է և գտնվում է Բելվեդերյան ծառուղում՝ Լազենկովյան պալատի հարևանությամբ։ Միաժամանակ, նախագահի հիմնական նստավայրը մնում է Կրակովի մերձակայքում գտնվող պալատը։
Լեհաստանի նախագահի պաշտոնական կայքի տեղեկության համաձայն՝ Բելվեդերի պատմությունն ունի շուրջ 500 տարվա վաղեմություն և սկիզբ է առնում XVI դարից։ Ենթադրաբար նրա տեղում գտնվել է թագուհի Բոնա Սֆորցայի՝ Սիգիզմունդ I թագավորի կնոջ նստավայրը։ Ավելի ուշ տարածքը պատկանել է Լիտվայի մեծ իշխանության կանցլեր Քշիշտոֆ Զիգմունդ Պացին, որը վերակառուցել է գոյություն ունեցող շենքը կամ կառուցել է նորը։
1818 թվականին պալատը ձեռք է բերվել Լեհական թագավորության իշխանությունների կողմից և նախատեսվել է որպես լեհական բանակի գլխավոր հրամանատար, մեծ իշխան Կոնստանտինի՝ կայսր Ալեքսանդր I-ի եղբոր նստավայր։ 1819–1822 թվականներին շենքն ամբողջությամբ վերակառուցվել է ճարտարապետ Յակուբ Կուբիցկու նախագծով։
Լեհաստանի անկախության վերականգնումից հետո Բելվեդերը դարձել է պետական սեփականություն և օգտագործվել որպես պաշտոնական նստավայր։ 1918 թվականի նոյեմբերին այնտեղ է տեղափոխվել պետության ղեկավար, մարշալ Յուզեֆ Պիլսուդսկին։
Նշվել է, որ ռուս դիվանագետները Գդանսկի հյուպատոսարանի շենքն օգտագործել են XX դարի կեսերից՝ 1951 թվականին ԼԺՀ-ի և ԽՍՀՄ-ի միջև ստորագրված անհատույց օգտագործման համաձայնագրի հիման վրա։
Օբյեկտի իրավական կարգավիճակի հարցը մնում է վիճելի․ ռուսական կողմը պնդում է, որ Բատորիի փողոցում գտնվող շենքն իր սեփականությունն է, մինչդեռ Լեհաստանը համարում է, որ ԽՍՀՄ փլուզումից հետո այն անցել է պետական գանձարանին։
Լեհաստանում Ռուսաստանի վերջին գլխավոր հյուպատոսարանը փակվել է անցյալ տարվա դեկտեմբերին։ Լեհաստանի ԱԳ նախարար Ռադոսլավ Սիկորսկին դա բացատրել էր երկաթուղում տեղի ունեցած մի շարք միջադեպերով, մինչդեռ Մոսկվան մերժել էր այդ մեղադրանքները։ Ի պատասխան՝ Ռուսաստանը փակել է Իրկուտսկում Լեհաստանի վերջին հյուպատոսարանը։
Կրեմլում ավելի վաղ հայտնել էին, որ Ռուսաստանի և Լեհաստանի հարաբերություններն «ամբողջությամբ դեգրադացվել են», հյուպատոսարանների փակումն արտացոլում է երկկողմ հարաբերությունների ներկա վիճակը։