Ռուսաստանի նախագահ Վլադիմիր Պուտինը հայտարարել է, որ երկրի խոշորագույն նավթավերամշակման գործարանների հզորությունները ներկայումս օգտագործվում են առավելագույն մակարդակով, հաղորդում է «Коммерсантъ»-ը։
Ըստ Ռուսաստանի նախագահի, ներքին շուկա լրացուցիչ ուղղվում են ավելի վաղ կուտակված վառելիքի պաշարները։
Պետության ղեկավարը նշել է, որ, չնայած պահուստների գործարկմանը, բենզինի ընթացիկ պաշարները մնում են գրեթե անցյալ տարվա նույն ժամանակահատվածի մակարդակին, թեև նվազել են մոտ 4%-ով։ Պուտինը ընդգծել է, որ վառելիքի շուկայում իրավիճակը պետք է շարունակել կարգավորել «կշռադատված և զգույշ» կերպով։
Նրա տվյալներով, Ռուսաստանում բենզինի պաշարները կազմում են մոտ 1,7 մլն տոննա, ինչը համադրելի է անցյալ տարվա ցուցանիշների հետ։
Ռուսաստանի նախագահը նաև հայտնել է, որ շուկան կայունացնելու նպատակով քննարկվում է դիզելային վառելիքի արտահանման ամբողջական արգելքի հնարավորությունը։ Ներկայումս դիզելի արտահանումը թույլատրված է միայն արտադրողներին, մինչդեռ նավթաթրեյդերների, նավթաբազաների և այլ միջնորդների համար այն արդեն սահմանափակված է։ Ապրիլի 1-ից մինչև հուլիսի 31-ը երկրում նաև գործում է բենզինի արտահանման արգելք շուկայի բոլոր մասնակիցների համար։
Ավելի վաղ ՌԴ փոխվարչապետ Ալեքսանդր Նովակը հայտնել էր, որ դիզելի արտահանման հնարավոր ամբողջական արգելքի հարցը կքննարկվի հունիսի 29-ին կայանալիք կառավարության խորհրդակցությունում։