Քարոզարշավի 20-րդ օրը վարչապետը դարձյալ սպառնաց գլխավոր ընդդիմախոսներին նետել բանտ։
«Կալուգացի օլիգարխը պետք է դատվի ոչ միայն փողերի լվացման և դպրոցներից ու մանկապարտեզներից ու զորամասերից հոսանքի գողության, այլև Հայաստանի պետական շահերի դեմ գործելու, մասնավորապես 300 հազար ադրբեջանցիների վերադարձի գոյություն չունեցող թեման Հայաստանի ներքաղաքական օրակարգ մրցնելու փորձերի համար», — ասել է Փաշինյանը։
Երեկվանից է վրդովված Նիկոլ Փաշինյանը։ Գնացել է տուն, փորձել YouTube-ով ոչ քաղաքական մի հաղորդում նայել։ Ընթացքում գովազդ է միացել, իսկ բովանդակությունն այսօր Նիկոլ Փաշինյանը մանրամասն պատմեց գրեթե բոլոր բնակավայրերում. «Ֆիլմ եմ նայում, մեկ էլ գովազդ տալիս եմ։ Մի հատ կին երեխու հետ մտնում է մանկապարտեզ, հայերեն, ասում է՝ «դե երեխուս բերել եմ մանկապարտեզ ընդունեք»։ Մանկապարտեզի տնօրենն էլ, այդպես կիսաժպիտով, ասում է․ «Դե գիտեք ինչ, Զաֆարովի երեխաներին ընդունել ենք, ձեր երեխաներին չենք կարող»։ Ես ասում եմ՝ «Այդ հոլովակը նկարողը հոգեկան հիվանդ է, իսկ այդ հոլովակի պատվեր տվողը, լրտես է, կալուգացի, դու նստելու ես բանտում տասնամյակներով, որպես Հայաստանի պետության դեմ գործող լրտես»։
300 հազար ադրբեջանցիների մասին գրեթե ամեն օր հայտարարում են իշխանության գլխավոր ընդդիմախոսները: Նրանք պնդում են, թե նիկոլ փաշինյանի վերընտրվելու դեպքում ադրբեջանցիները գալու են և բնակվեն Հայաստանում: Վարչապետը հայտարարեց, թե ընդդիմադիրները փորձում են բացել այս թեման, որն իրենք փակել են դեռ 2024-ին:
«Այդ թեման իրանք լրտեսական միսիայով մտցնում են Հայաստանի քաղաքական կյանքի օրակարգ: Մենք այդ թեման փակել ենք, փակել ենք անդառնալիորեն 2024 թվին, ասելով, հայտարարելով Լեռնային Ղարաբաղի, Ղարաբաղի շարժման ավարտի և չշարունակելու մասին։ Այո, մենք փակել ենք 500 հազար հայ Ադրբեջան վերադառնալու թեման և դրանով իսկ փակել ենք ադրբեջանցիների վերադառնալու թեման», — նշեց վարչապետը։
Նիկոլ Փաշինյանը, սակայն, չասաց, թե ինչու է այս, ինչպես ինքը ձևակերպեց, փակված թեմայով Նախիջևանում հունիսի կեսերին կազմակերպվելու «Վերադարձ Արևմտյան Ադրբեջան» երրորդ փառատոն կոնգրեսը:
Անցած շաբաթ Հայաստանի արտգործնախարարն անդրադարձել էր այդ փառատոնին՝ նշելով, թե դա խաղաղության խոսույթի մեջ չի տեղավորվում. «Քանի անգամ առիթ ունեցել ենք ասելու, որ «Արևմտյան Ադրբեջանի» խոսույթը և դրա հովանավորումը կամ աջակցությունը Ադրբեջանի պետական կառույցներից չի տեղավորվում խաղաղության և բարեդրացիության, միմյանց քաղաքական անկախության և տարածքային ամբողջականության ճանաչման, այդ մեծ խոսույթի և գործընթացի շրջանակներում, որը մենք Ադրբեջանի մեր գործընկերների հետ նախաձեռնել ենք»։