Այսօրվանից Ռուսաստան հայկական ծաղիկների ներմուծման սահմանափակումը վարչապետ Նիկոլ Փաշինյանը համարում է հերթական աշխատանքային իրավիճակ:
Ռուսաստանի սննդի անվտանգության վերահսկող ծառայությունը՝ «Ռոսսելխոզնադզոր»-ը, նախօրեին հայտնեց՝ Հայաստանից ծաղիկների ներմուծումը ժամանակավորապես կսահմանափակվի: Արդեն այսօր մանրամասնեցին՝ արգելքը ուժի մեջ կմնա մինչև ջերմոցների ստուգման ավարտը և արդյունքների վերլուծությունը:
«Հարց է ծագում՝ այսքան վարդ է ներմուծվում Ռուսաստան, ինչքանո՞վ են իրոք էդ վարդերն արտադրվում Հայաստանում: Հիմա պատվիրակություն է եկել, դա միայն Հայաստանի համար չի, այդպիսի տասնյակ պատվիրակություններ գնում են տարբեր երկրներ, որովհետև երկրները հարցեր են բարձրացնում: Սա հերթական աշխատանքային իրավիճակն է», — նշեց Փաշինյանը:
Հայաստանից ծաղկի արտահանումը վերջին տարիներին էականորեն աճել է։ Ըստ Վիճակագրական կոմիտեի, ծաղկի արտահանումը վերջին հինգ տարվա կտրվածքով աճել է 7 անգամ՝ 7.4 մլն դոլարից հասնելով ավելի քան 53 միլիոնին։ Ռուսաստանը հայկական ծաղիկների հիմնական գնորդն է։ Նիկոլ Փաշինյանն այսօր պնդեց, թե նման սահմանափակումներ միշտ էլ եղել են ու կլինեն, եթե պարզվի, որ ապրանքը չի համապատասխանում ստանդարտներին:
«Վերջին ութ տարիներին նման իրավիճակներ տասնյակ անգամներ են եղել, ընդ որում՝ ոչ միայն ֆիտոսանիտարական, ուրիշ խնդիրներ ևս եղել են կապված այլ ապրանքների հետ: Մենք ԵԱՏՄ նիստերում անընդհատ այդ հարցերը քննարկում ենք, թե ինչքանով են որոշ ապրանքներ, որոնք ներկրվում են, այսինքն, արտահանվում, ներկրվում են որպես ԵԱՏՄ ապրանք, ինչքանով են ԵԱՏՄ ապրանք», — նշեց Փաշինյանը:
Ռուս մասնագետների ժամանման մասին հայկական կողմը հայտնեց երեկ: Նրանք ստուգումներ են անցկացնում հայաստանյան ջերմոցներում: Մինչև այդ ներկայացրել են արձանագրված խախտումները: