Ուկրաինայի նախագահ Վլադիմիր Զելենսկին ստորագրել է հրամանագրեր, որոնցով ուժի մեջ է մտցրել Ազգային անվտանգության և պաշտպանության խորհրդի որոշումը՝ պատժամիջոցներ կիրառելու ռուսաստանյան և իրանական այն ընկերությունների ու քաղաքացիների նկատմամբ, որոնք սպասարկում են Ռուսաստանի ռազմաարդյունաբերական համալիրը, ինչպես նաև պարալիմպիկ մարզիկների նկատմամբ, որոնք «արդարացնում են ՌԴ ագրեսիան և տարածում ռուսաստանյան քարոզչությունը»։ Այս մասին, հղում անելով Ուկրաինայի նախագահի գրասենյակին, հայտնում է Rubryka-ն։
Պատժամիջոցների փաթեթում ներառվել է 130 ֆիզիկական և 48 իրավաբանական անձ։
Ըստ հաղորդագրության, նրանց թվում են «Կոմետա» սերիայի արբանյակային նավիգացիոն սարքավորումների բաղադրիչների մատակարարմանը մասնակցող ընկերությունները (դրանք օգտագործվում են ռուսաստանյան անօդաչուների, թևավոր և բալիստիկ հրթիռների, կառավարվող զինամթերքի ու այն ինքնաթիռների մեջ, որոնցով Ռուսաստանը ռմբակոծում է ուկրաինական քաղաքներն ու բնակավայրերը): Պատժամիջոցներ են սահմանվել նաև այն ձեռնարկությունների դեմ, որոնք ներգրավված են «Օրեշնիկ» հրթիռային համալիրի արտադրության մեջ։
Ուկրաինայի սահմանափակումների տակ են հայտնվել նաև Իրանի այն քաղաքացիները, որոնք առնչություն ունեն իրանական անօդաչուների և հրթիռների արտադրությանը. դրանք «կիրառվում են ոչ միայն Ուկրաինայի դեմ, այլև Մերձավոր Արևելքում՝ Պարսից ծոցի երկրների դեմ»։
«Այս իրավաբանական և ֆիզիկական անձինք օգնել են Ռուսաստանին սկսել, տեղակայել և ընդլայնել «Շահեդների» արտադրությունը Ռուսաստանում։ Պատժամիջոցներ են կիրառվել նաև իրանցի հրահանգիչների նկատմամբ, որոնք վերապատրաստել են «Շահեդների» ռուսաստանցի օպերատորներին, որոնք այնուհետև հարձակվել են ուկրաինական քաղաքների և էներգետիկ օբյեկտների վրա»,- գրում է լրատվամիջոցը։