«Թրամփի ուղին միջազգային խաղաղության և բարգավաճման համար» (TRIPP) ծրագիրն աստիճանաբար թուլացնում է Ռուսաստանի դիրքերը որպես Հարավային Կովկասում խոշոր խաղացող, ասվում է Ուկրաինայի արտաքին հետախուզության ծառայության հայտարարության մեջ։
«Առնվազն 49 տարի հայ-ամերիկյան համատեղ կառավարման ընկերությունը կապահովի նախագծի շահագործումը և հաղորդակցությունը նախկին հակառակորդների՝ Հայաստանի և Ադրբեջանի միջև պատերազմում։ Մինչև վերջերս Մոսկվան իրեն ներկայացնում էր որպես տարածաշրջանում գլխավոր և միակ միջնորդ։
TRIPP նախագիծը ներառում է նավթի և գազի խողովակաշարերի, օպտիկամանրաթելային ցանցերի կառուցում, ինչպես նաև երկաթուղային և ճանապարհային ենթակառուցվածքների ստեղծում Իրանին սահմանակից երկաթուղային գծի երկայնքով։ Շահառուների կարծիքով՝ միջանցքը կդառնա «կարևոր օղակ» տրանսկասպյան երթուղում, որն անցնում է Չինաստանով, Ղազախստանով, Կասպից ծովով, Ադրբեջանով, Վրաստանով և այնուհետև դեպի Թուրքիա և եվրոպական երկրներ։ ՀՀ արտգործնախարար Արարատ Միրզոյանի խոսքով՝ նախագծին Ռուսաստանի մասնակցությունն ամերիկյան և հայկական կողմերը նույնիսկ չեն քննարկել։
Միևնույն ժամանակ, ՀՀ վարչապետ Նիկոլ Փաշինյանը համարյա վերջնագիր է ներկայացրել «Ռուսական երկաթուղիներ» ընկերությանը՝ հայկական երկաթուղու այժմյան կոնցեսիոներին՝ առաջարկելով արագ վերականգնել վնասված գծերը մինչև Ադրբեջանի և Թուրքիայի հետ սահմաններ։ Հակառակ դեպքում դա կարվի Հայաստանի հաշվին, ինչը կասկածի տակ կդնի տարածաշրջանում Ռուսաստանի ներկայության կենսունակությունը»,- ասվում է հայտարարության մեջ։