Ռուսաստանը «ուս ուսի» կանգնած է Վենեսուելայի ղեկավարության կողքին և կոչ է անում ԱՄՆ նախագահ Դոնալդ Թրամփի վարչակազմին զերծ մնալ Կարակասի հետ լայնածավալ հակամարտության մեջ ներքաշվելուց։ Այս մասին ТАСС-ին հայտնել է ՌԴ ԱԳ փոխնախարար Սերգեյ Ռյաբկովը։
Բարձրաստիճան դիվանագետը նշել է, որ Մոսկվայում Վենեսուելայի շուրջ տեղի ունեցող իրադարձությունները մեծ տագնապով և անհանգստությամբ են ընկալում, քանի որ «լարվածությունը չի թուլանում», իսկ «սրումը շարունակվում է»։
«Դա նախևառաջ կապված է տարածաշրջանում Միացյալ Նահանգների անվերապահ գերիշխանությունը հաստատելու ձգտման հետ. դա Թրամփի վարչակազմի «ապրանքանիշն» է»,- պարզաբանել է Ռյաբկովը։
«Մենք համերաշխություն ենք հայտնում Վենեսուելային. վերջերս կնքվել է ռազմավարական գործընկերության և համագործակցության մասին պայմանագիր,- շարունակել է ԱԳ փոխնախարարը։ — Մենք աջակցում ենք Վենեսուելային բազմաթիվ հարթակներում, ինչպես և նա՝ մեզ։ Փորձությունների այս պահին մենք «ուս ուսի» կանգնած ենք Կարակասի, Վենեսուելայի ղեկավարության հետ։ Հույս ունենք, որ Թրամփի վարչակազմն այնուամենայնիվ զերծ կմնա դեպի լայնածավալ հակամարտություն հետագա գլորումից։ Մենք նրան դրա կոչն ենք անում»