Մեծ Բրիտանիայի վարչապետ Քիր Սթարմերը հայտնել է, որ այժմ Կիեւի դաշնակիցների հիմնական ուշադրությունը կենտրոնացած է Ժնեւում վաղը կայանալիք խաղաղ բանակցությունների վրա, տեղեկացրել է Sky News-ը։
Սթարմերն ավելացրել է, որ մտադիր է առաջիկա օրերին խոսել Դոնալդ Թրամփի, իսկ այսօր երեկոյան՝ Վլադիմիր Զելենսկու հետ։
Նա նաեւ հայտնել է, որ հրադադարի դեպքում Ուկրաինան «պետք է ի վիճակի լինի պաշտպանել իրեն», ուստի ինքը եւ դաշնակիցները մտահոգություն են հայտնել Կիեւի ռազմական ուժի վրա դրվելիք սահմանափակումների առիթով։
«Կոնսենսուսն այն էր, որ 28 կետից բաղկացած պլանում կան տարրեր, որոնք կարեւոր նշանակություն ունեն ամուր խաղաղության համար, բայց դրանք լրացուցիչ աշխատանք են պահանջում, եւ մենք պատրաստվում ենք զբաղվել դրանով։
Հենց այդ պատճառով էլ պայմանավորվածություն է ձեռք բերվել այն մասին, որ վաղը Ժնեւում կլինեն ԱՄՆ բարձրաստիճան ներկայացուցիչները, եվրոպացի խորհրդականներ եւ, իհարկե, ուկրաինացիներ՝ նախագծի շուրջ հետագա աշխատանքի համար»,- նշել է Մեծ Բրիտանիայի վարչապետը։