Ռոբերտ Ֆիցոյի իշխանության վերադառնալուց հետո առաջին անգամ Սլովակիայի կառավարությունը հայտարարել է Ուկրաինային ռազմական աջակցության նոր փաթեթի մասին: Ըստ «Интерфакс-Украина»-ի՝ փաթեթի մասին Կիևում անցկացված Պաշտպանական արդյունաբերության միջազգային ֆորումում հայտարարել է փոխվարչապետ և պաշտպանության նախարար Ռոբերտ Կալինյակը:
«Մեծ ուրախությամբ հայտարարում եմ, որ նախարար Շմիգալի հետ հենց նոր ստորագրեցինք 14-րդ աջակցության փաթեթի վերաբերյալ հուշագիր, որը նախատեսում է Սլովակիայի կողմից Ուկրաինային ինժեներական և ականազերծման օգնություն ցուցաբերել»,- ասել է Կալինյակը:
Նա միաժամանակ նշել է, որ Կիևում բանակցությունների ընթացքում կքննարկի պաշտպանական համագործակցության ընդլայնման հնարավոր նախագծերը:
Կալինյակը հայտնել է նաև, որ Սլովակիայի վարչապետ Ռոբերտ Ֆիցոյի և Ուկրաինայի նախագահ Զելենսկու միջև վերջերս անցկացված հանդիպման ժամանակ պաշտպանական համագործակցությունը նշվել է որպես առաջիկա միջկառավարական հանդիպման հիմնական թեմաներից մեկը:
Հիշեցնենք, որ լայնածավալ պատերազմի սկզբում այն ժամանակվա Սլովակիայի կառավարությունը Եվրոպայում առաջիններից մեկն էր, որը սկսեց Ուկրաինային տրամադրել զգալի ռազմական օգնություն, մասնավորապես՝ С-300 հակաօդային պաշտպանության համակարգեր և խորհրդային կործանիչներ: