ՌԴ նախագահի մամուլի քարտուղարը նշել է, որ Եվրոպական պատժամիջոցների նախորդ տասնութ փաթեթները վնաս են հասցրել ԵՄ տնտեսությանը:
ԵՄ-ն շարունակում է թշնամական գիծը ՌԴ-ի նկատմամբ։ Այս հայտարարությունն արել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով հակառուսական պատժամիջոցների 19-րդ փաթեթի քննարկումը։
Ավելի վաղ Եվրահանձնաժողովի ղեկավար Ուրսուլա ֆոն դեր Լյայենը հայտնել էր, որ լրացուցիչ միջոցառումների միջոցով Ռուսաստանի վրա տնտեսական ճնշումն ուժեղացնելու համատեղ ջանքերի ամրապնդման շուրջ «լավ զրույց» է ունեցել ԱՄՆ նախագահ Դոնալդ Թրամփի հետ: Նա նշել էր, որ հանձնաժողովը շուտով կներկայացնի պատժամիջոցների իր 19-րդ փաթեթը, որ կապված է կրիպտոարժույթի, բանկերի և էներգետիկայի հետ:
«Տվյալ դեպքում Եվրամիությունը, եվրոպական երկրներն առանձին-առանձին, նրանցից շատերը շարունակում են բավական թշնամական գիծը Ռուսաստանի նկատմամբ»,- ասել է Պեսկովը:
Նա նաև նշել է, որ եվրոպական պատժամիջոցների նախորդ 18 փաթեթները վնաս են հասցրել ԵՄ տնտեսությանը:
«Ըստ էության, նախորդ 18 փաթեթների վերաբերյալ ոչ թե մենք, այլ մյուսները պիտի ասեն, թե որքանով են դրանք արդյունավետ եղել։ Եվ եթե քննարկենք այդ 18 փաթեթների արդյունավետության թեման, իհարկե, անհնար է հաշվի չառնել այն վնասները, որոնք այդ 18 փաթեթները հասցրել են Եվրամիության տնտեսությանը։ Տվյալ դեպքում Եվրամիությունը շարունակում է այդ ապակառուցողական գիծը»,-ասել է Պեսկովը։
Հիշեցնենք՝ 2022–ի փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ ռազմական հատուկ գործողություն սկսելու որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Պուտինի խոսքով` նպատակը մեկն է` պաշտպանել նրանց, ովքեր 8 տարի շարունակ ծաղրի ու ցեղասպանության են ենթարկվել Կիևի ռեժիմի կողմից, և դրա համար նախատեսվում է իրականացնել Ուկրաինայի ապառազմականացում և ապազգայնականացում, դատի տալ բոլոր ռազմական հանցագործներին, որոնք պատասխանատու են Դոնբասի խաղաղ բնակիչների դեմ արյունալի հանցագործությունների համար: Արևմուտքի երկրներն ի պատասխան լայնածավալ պատժամիջոցներ են սահմանել Ռուսաստանի դեմ։