Պիոտրովսկի, Ավետիսյան, Տիմատի. ովքեր են հայտնվել Ռուսաստանի դեմ ԵՄ պատժամիջոցների 20-րդ փաթեթում
Եվրոպական միությունը Ռուսաստանի դեմ պատժամիջոցների իր 20-րդ փաթեթում ներառել է Էրմիտաժի տնօրեն Միխայիլ Պիոտրովսկուն, ռուս միլիարդատեր Վլադիմիր Ավետիսյանին և երգիչ Տիմատիին: Դրա մասին վկայում են ԵՄ պաշտոնական հանդեսի տվյալները:
Ինչպես նշվում է հանդեսում, Միխայիլ Պիոտրովսկին Ռուսաստանի նախագահ Վլադիմիր Պուտինի «մտերիմ զինակիցն է», նա «ակտիվորեն սատարել և արդարացրել է Ուկրաինայի դեմ Ռուսաստանի ագրեսիվ պատերազմը»:
«Նրա ղեկավարությամբ Էրմիտաժը չարտոնված հնագիտական պեղումներ է իրականացրել բռնազավթված Ղրիմում՝ ներառյալ ուկրաինական ժառանգության պահպանվող օբյեկտների ոչնչացումը՝ դրանով իսկ ծառայելով Կրեմլի նպատակին՝ օրինականացնելու իր տարածքային հավակնությունները գիտական աշխատանքի քողի տակ: Այսպիսով, Միխայիլ Պիոտրովսկին աջակցում է այնպիսի գործողությունների կամ քաղաքականության, որոնք խաթարում կամ սպառնում են Ուկրաինայի տարածքային ամբողջականությանը, ինքնիշխանությանը և անկախությանը»,- մասնավորապես նշված է ամսագրում:
Վլադիմիր Եվգենիևիչ Ավետիսյանը, ինչպես ընդգծվում է ԵՄ հանդեսում, մաժորիտար բաժնետեր և շահառու սեփականատերն է մի շարք ընկերությունների, որոնք գործարար շահեր ունեն ռուսական տնտեսության տարբեր ոլորտներում, ինչպիսիք են բանկային գործը և, մասնավորապես, էներգետիկ սեկտորը: Նա համարվում է գործող ձեռնարկատեր տնտեսության այնպիսի ոլորտներում, որոնք «եկամտի զգալի աղբյուր են ապահովում Ռուսաստանի Դաշնության կառավարությանը»:
Պատժամիջոցների ցուցակում երգիչ Տիմատիի (Տիմուր Յունուսով) հայտնվելը Եվրամիությունը բացատրել է Ուկրաինայում Ռուսաստանի պատերազմին նրա աջակցությամբ, «կրեմլյան քարոզչական նարատիվների և այսպես կոչված «հատուկ ռազմական գործողության» խորհրդանիշների տարածմամբ», ինչպես նաև «Ուկրաինայի դեմ անձամբ կռվելու պատրաստակամության մասին» հայտարարություններով:
Պատժամիջոցների ցուցակում են հայտնվել նաև Ռուսաստանի հետ կապված ձեռնարկություններ և բիզնեսներ՝ Մոսկվայի ֆիզիկատեխնիկական ինստիտուտը, «Ստանկոստրոյենիե» ՍՊԸ-ն, չինական Brightmile Ltd ընկերությունը, ղազախական LLP «United Trading Group»-ը, էմիրաթական «EQUIPMENT DELIVERY MANAGEMENT»-ը և այլն:
Ավելի վաղ Եվրոպական խորհուրդը հայտնել էր վերջին 2 տարվա ընթացքում ամենախոշոր՝ 20-րդ փաթեթի մանրամասները:
