Ահա այսպես չենք ունենա ոչ մի ներդրում

2022-23 ուսումնական տարին Գյումրիի Անի համայնքի դպրոցը պիտի սկսվեր հիմնովին վորանորոգված։ Սակայն դպրոցի առաջին հարկի դասասենյակների մեծ մասը կմնա չշահագործված՝ վերանորոգման հետ կապված խնդիրների պատճառով։
Գյուղի դպրոցի վերանորոգման գործում իր ներդրումն էր ակնկալում ունենալ Ռուսաստանաբնակ հայազգի գործարար Արմեն Սերոբյանը։ Նա դպրոցի տնօրինության հետ կնքված պայմանագրով պատրաստվում էր ներքին հարդարման համար համարյա ինքնարժեքով տրամադրել միջսենյակային դռներ։ Գործարարը խոստացել էր հոգալ նույնիսկ տեղափոխման բոլոր ծախսերը։ Բայց ինչպես հաճախ է Հայաստանում պատահում , ապրանքը հասցեատիրոջը չէր հասել մաքսային մարմիններում բյուրոկրատական քաշքշուկի պատճառով։
Մեզ հաջողվել է հեռախոսազրույց ունենալ Արմեն Սերոբյանի մոտ, որն այժմ գտնվում է Հայաստանում։
Հեռախոսազրույցի ընթացքում նա պատմեց, որ օգոստոսի սկզբին մասնավոր տրանսպորտային ընկերության միջոցով Հայաստան էր ուղարկել 30 միջսենյակային դուռ, միաժամանակ օգտվելով հնարավորությունից փոխադրող ընկերության ներկայացուցչի հետ նախնական համաձայնությամբ բեռնել էր նաև մի քանի արկղ՝ լցված դեղորայքով, պահածոներով, առաջին անհրաժեշտության պարագաներով, որը նախատեսված էր Հայաստանի տարածքով Ուկրաինա տեղափոխելու համար, որպես մարդասիրական օգնություն։
Արմենի փեսան և գործընկերը՝ Գևորգ Իսկանդարյանը ազգականներ ուներ Ուկրաինայում , որոնք շատ ընտանիքների պես անմարդկային տառապանքի ու զրկանքների մեջ մի կերպ գոյատևում էին Ուկրաինայում՝ օրեր ու շաբաթներ անցկացնելով ռմբապաստարաններում։ Նրանք հույս ունեին փոքր ինչ թեթևացնել նրանց հոգսը ու հնարավորության դեպքում պարբերաբար կազմակերպել նման բեռների տեղափոխում Հայաստանի տարածքով։
Սակայն Բագրատաշենի սահմանային անցակետում արդեն բախվել էին խնդիրների։ Մաքսային ծառայության աշխատակիցները մոտեցել էին, զննել, հարցուփորձ արել ու ինչ-ինչ անհամապատասխանություններ էին արձանագրել դռները մաքսային ձևակերպման փաստաթղթերում։ Արմեն Սերոբյանը պատմում է, որ բեռը տեղափոխող վարորդը զանգել էր Գևորգին և ասել, որ կարծես թե ակնարկում են , որ միայն որոշակի գումարի դիմաց առանց ավելորդ խոչընդոտների թույլ կտան բեռնատարը հատի ՀՀ սահմանը։ «Գևորգը չհամաձայնեց, ասաց ինչու պիտի կաշառք տանք, երբ համարյա անվճար դպրոցին դռներ ենք տանում և փաստաթղթերն էլ ամբողջությամբ օրենքով կազմված են»,- պատմում է Արմեն Սերոբյանը,-« Շատ էր բարկացել ու որոշել էր մեկնել Հայաստան՝ տեղում խնդիրը լուծելու»։
Չստանալով սպասվող գումարը, մաքսավորները, իբրև անօրինական փոխադրում, բեռնատարը տեղափոխել էին մաքսային հսկողության տարածք՝ լրացուցիչ ստուգման համար, որի համար օիրենքով նախատեսված է մինչև 120 օր ժամկետ։ Գևորգ Իսկանդարյանը գալիս է Հայաստան ու բողոք է ներկայացնում Մասքային կոմիտե՝ իր բեռը անհիմն մաքսային պահեստում պահելու , ինչպես նաև կաշառք պահանջելու համար։ Սա ճակատագրական է դառնում նրա համար։ Մաքսային կոմիտեի նախաբացթողումային բաժնի պետ Կարեն Թամազյանը իր մարդկանց հանձնարարում է գտնել Գևորգին և «ինչպես հարկն է՝ դաս տալ» նրան։ Արմենի բառերով Գևորգը մի կերպ էր ողջ մնացել ու թողնելով բեռը, շտապ հեռացել էր Հայաստանից։ Բայց դրանով խնդիրները չէին ավարտվել։ Այս դեպքը միջպետական սկանդալի էր վերածվելու, եթե Կարեն Թամազյանը չկարողանար լեզու գտնել ռուսական կողմի հետ։
Գևորգ Իսկանդարյանը Ռուսաստան վերադառնալուն պես ԵԱՏՄ Մաքսային միության համակարգող մարմին նամակ էր գրել ու ներկայացրել այն ամենը , ինչ տեղի էր ունեցել իր ապրանքի հետ, ըստ էության պատմել, որ հայաստանայան մաքսային մարմինը թերանում է իր աշխատանքում ու չի պահպանում Մաքսային միության կանոնները։ Այդ ժամանակ հայաստանյան կողմը սեփական թերացումները կոծկելու համար, Ռուսաստանին գրավոր հայտնել էր, որ ՌԴ քաղաքացիներ Արմեն Սերոբյանը և Գևորգ Իսկանդարյանը Հայաստան բեռնափոխադրման պատրվակով հումանիտար բեռներ են տեղափոխում Ուկրաինա։
Գևորգի ու Արմենի նկատմամբ Ռուսաստանում հետապնդումներ են սկսվել իրավապահ մարմնինների կողմից։ Նրանց բռնության են ենթարկել ու սպառնացել պատերազմ ուղարկել, ինչի հետևանքով երկուսն էլ ստիպված են եղել փախնել ՌԴ-ից։ Հիմա Արմեն Սերոբյանը Հայաստանում է և մտադիր է անձամբ զբաղվել մաքսային պահեստում տևական ժամանակ պահվող իրենց բեռի մաքսազերծման հարցով։ Սերոբյանը դիմել է Պետական եկամուտների կոմիտե և խնդրել հանդիպում կոմիտեի ղեկավար Ռուստամ Բադասյանի հետ։ Օրերս նամակ է ստացել կոմիտեից, որ Բադասյանը պատրաստ է հանդիպել, քննարկել ստեղծված իրավիճակը ու անձամբ հարթել խնդիրը։ Արդյոք կստանա իր հարցի լուծումը, Սերոբյանը վստահ չէ, քանի որ հարցը արդեն դուրս է եկել Հայաստանի սահմաններից և դա արդեն նեղ մաքսային խնդիր չէ մի բեռնատարի հետ կապված ։