Ադրբեջանի Միլլի մեջլիսը երրորդ ընթերցմամբ հաստատել է արհեստական բանականության կիրառմամբ պատրաստված անօրինական նյութերի պատրաստման և տարածման համար տուգանքներն ու պատիժները. հայտնում են տեղական լրատվամիջոցները։
Քրեական և Քրեական դատավարության օրենսգրքերում, ինչպես նաև «Տեղեկատվության, տեղեկատվայնացման և տեղեկատվության պաշտպանության մասին» ու «Մեդիայի մասին» օրենքներում համապատասխան փոփոխությունների նախագիծը քննարկվել է խորհրդարանի ապրիլի 21-ի լիագումար նիստում։
Ըստ նախագծի՝ արհեստական բանականության տեխնոլոգիաների կիրառմամբ իրականությունը չարտացոլող լուսանկարների, տեսանյութերի կամ աուդիոնյութերի պատրաստումը՝ անձի պատկերի կամ ձայնի օգտագործմամբ՝ առանց վերջինիս համաձայնության, ինչպես նաև դրանց տարածումը մեդիայում կամ, զանգվածային տարածման դեպքում, ինտերնետային ռեսուրսներում և տեղեկատվական-հեռահաղորդակցական ցանցերում, պատժվում է՝ 3 000-7 000 մանաթի չափով տուգանքով, 360-480 ժամ հանրային աշխատանքներով, մինչև 3 տարի ժամկետով ազատության սահմանափակմամբ կամ նույն ժամկետով՝ ազատազրկմամբ: