Սերբական Հանրապետության խորհրդարանը շաբաթ օրը Անա Տրիշիչ Բաբիչին նշանակել է ժամանակավոր նախագահ՝ առաջին անգամ պաշտոնապես ընդունելով, որ նախկին նախագահ Միլորադ Դոդիկը հրաժարական է տալիս այն բանից հետո, երբ պետական դատարանը նրան արգելել է զբաղվել քաղաքականությամբ, հայտնում է Reuters-ը։
Տրիշիչ Բաբիչը՝ Դոդիկի մերձավոր զինակիցը, պաշտոնը կզբաղեցնի մեկ ամիս, մինչև որ նոյեմբերի 23-ին Սերբական Հանրապետությունում տեղի կունենան նախագահական նոր ընտրությունները։
Խորհրդարանը նաև չեղյալ է հայտարարել մի շարք անջատողական օրենքներ, որոնք ընդունվել էին վերջին մեկ տարվա ընթացքում այն բանից հետո, երբ Դոդիկին մեղադրանքներ էին առաջադրվել միջազգային բանագնացի և Սահմանադրական դատարանի որոշումներն անտեսելու համար։
Դոդիկը, որը հանդես է գալիս Սերբական Հանրապետության անջատման և Սերբիային միանալու օգտին, մինչև այժմ մերժում էր հրաժարական տալ և շարունակում էր կատարել իր պարտականությունները և մեկնել արտասահման՝ որպես նախագահ։
Նա բողոքարկում է պետական դատարանի վճիռը Սահմանադրական դատարանում։ Դոդիկը հայտարարել է, որ, չնայած խորհրդարանում շաբաթ օրվա քվեարկությանը, Սերբական Հանրապետությունը չի փոխի իր քաղաքականությունը, և անջատումը մնում է իր վերջնական նպատակը։ Սակայն նա պետք է այս քայլն աներ արտասահմանյան գործընկերների հետ համակարգելով, ասել է Դոդիկը։
ԱՄՆ Պետդեպարտամենտը ողջունել է շաբաթ օրվա քայլը՝ հայտարարելով, որ այն ԱՄՆ-ի գլխավորած ջանքերի արդյունքն է «Բոսնիա և Հերցեգովինայում ճգնաժամը կարգավորելու ուղղությամբ»։
«Միացյալ Նահանգները ողջունում է Սերբական Հանրապետության Ազգային ժողովի այսօրվա որոշումը, որը հաստատում է կայունությունը Բոսնիա և Հերցեգովինայում։ Սա նաև կորոշի կառուցողական գործընկերության ընթացքը Միացյալ Նահանգների հետ՝ հիմնված փոխադարձ շահերի, տնտեսական ներուժի և ընդհանուր բարգավաճման վրա», — Reuters-ին հայտնել է Պետդեպարտամենտի Եվրոպայի և Եվրասիայի հարցերով բյուրոյի ավագ աշխատակից Բրենդան Հանրահանը։
ԱՄՆ ֆինանսների նախարարությունը ուրբաթ օրը հայտարարել է, որ Դոդիկի չորս դաշնակիցներին հանել է պատժամիջոցների ցուցակից, ինչը բարձր է գնահատվել հենց Դոդիկի կողմից, որը քարոզարշավ էր իրականացնում իր նկատմամբ ԱՄՆ պատժամիջոցները չեղարկելու համար։ Նա պատժամիջոցների էր ենթարկվել ԱՄՆ-ի և Մեծ Բրիտանիայի կողմից՝ 1990-ականներին Բոսնիայի պատերազմը դադարեցրած Դեյթոնի խաղաղության համաձայնագրի պայմանների կատարմանը խոչընդոտելու համար, ինչպես նաև մի շարք եվրոպական երկրների կողմից, որոնք պնդում են, որ նրա անջատողական քաղաքականությունը սպառնում է Բոսնիայում խաղաղությանն ու կայունությանը։