Ուկրաինական կողմն ավելի վաղ հայտնել էր Կիևում հզոր պայթյունների մասին։ Քաղաքապետ Վիտալի Կլիչկոյի խոսքով՝ վնասվածքներ են գրանցվել Կիևի 6 շրջանների ավելի քան 20 օբյեկտներում:
Ռուսաստանի պաշտպանության նախարարությունը հայտնել է, որ գիշերը զանգվածային հարվածներ են հասցրել Ուկրաինայի ռազմարդյունաբերական համալիրի ձեռնարկություններին։
«Այսօր գիշերը Ռուսաստանի Դաշնության Զինված ուժերը զանգվածային հարված են հասցրել Ուկրաինայի ռազմարդյունաբերական համալիրի ձեռնարկություններին, որոնք օգտագործվում են Ուկրաինայի զինված ուժերի կարիքների համար, ինչպես նաև ռազմական օդանավակայանների ենթակառուցվածքներին»,-նշված է գերատեսչության տելեգրամյան ալիքում:
Նշվում է, որ ՌԴ ԶՈւ-ն գրոհել է նաև էլեկտրական ենթակայանները, որոնք ապահովում են սպառազինության և տեխնիկայի երկաթուղային փոխադրումը Դոնբասի մարտական գործողությունների շրջաններ:
Բացի այդ, ՌԴ հակաօդային պաշտպանության ուժերը ոչնչացրել են 230 անօդաչու թռչող սարք, 6 կառավարվող ավիացիոն ռումբ և HIMARS համազարկային կրակի համակարգերի 6 ռեակտիվ արկ:
Ավելի վաղ Ուկրաինայի հանրային հեռուստաալիքը հաղորդել էր այդ երկրի ԶՈւ կողմից վերահսկվող Խերսոն քաղաքում գրանցված պայթյունների մասին։ Նշվում է, որ առնվազն 20 հարված է հասցվել Կիևին և Կիևի մարզին: