Լեյտենանտը երեք անգամ վիրավորվել է, բազմիցս աչքի է ընկել մարտական խնդիրներ կատարելիս և դրա համար պարգևատրվել է «Արիության համար» շքանշանով ու «Խիզախության համար» մեդալով:
Լեյտենանտ-գրոհային Ռուդիկ Մանուկյանը, որը 2022 թվականի փետրվարի 24-ից մասնակցում է ռազմական հատուկ գործողությանը, դարձել է «Համաձայնություն» միջազգային ամենամյա մրցանակի դափնեկիր։ Այս մասին հայտնում է Ռուսաստանի հայերի միությունը։
«Արիությունը որպես կենսակերպ» անվանակարգում մրցանակը նրան է հանձնել Հաղթանակի զորավարների հիշատակի հիմնադրամի նախագահ, Խորհրդային Միության լեգենդար մարշալ Իվան Կոնևի դուստրը` Նատալյա Կոնևան։
Մանուկյանը ծնվել է Հայաստանում, բայց նրա ընտանիքը 1993 թվականին տեղափոխվել է Ռուսաստան։ 2013թ. ժամկետային ծառայություն է անցել Սամարայում, այնուհետև գնացել է Իժևսկ՝ ծնողների մոտ։ Մանուկյանը սպորտի վարպետ է, մարտական սամբոյում հաղթանակների է հասել, բայց նախընտրել է ռազմական գործը և դարձել կադրային սպա:
Նա երեք անգամ վիրավորվել է, բազմիցս աչքի է ընկել մարտական խնդիրներ կատարելիս, որի համար պարգևատրվել է «Արիության համար» շքանշանով, 2 անգամ «Խիզախության համար» մեդալով, Ժուկովի մեդալով, «Արիության համար» երկրորդ աստիճանի, 2 անգամ՝ մարտական ծառայությունների համար մեդալներով։
Ռազմական հատուկ գործողության ընթացքում Ռուդիկ Մանուկյանը հասել է գումարտակի շտաբի պետի պաշտոնին։ Նա ամուսնացած է, ունի երեք երեխա։
«Համաձայնություն» միջազգային մրցանակի հանձնման արարողությունը տեղի է ունեցել Կրեմլի պետական պալատում այս տարվա սեպտեմբերի 7-ին Ռուսաստանի հայերի միության 25-ամյակին նվիրված հանդիսավոր համերգի շրջանակում։