Թել Ավիվի դատարանը Նեթանյահուի օգնականին թույլատրել է վերադառնալ աշխատանքի՝ չնայած տեղեկության արտահոսքի մեղադրանքին

Թել Ավիվի շրջանային դատարանը մերժել է Իսրայելի Պետական դատախազության հայցը՝ արգելելու վարչապետ Բենիամին Նեթանյահուի մերձավոր օգնական Յոնաթան Ուրիխի և կառավարության ղեկավարի միջև շփումները, որը ներկայացվել էր Bild պարբերականից փաստաթղթի արտահոսքի գործով նրան առաջադրված մեղադրական եզրակացությունից հետո, գրում է The Times of Israel պարբերականը։

Դատավոր Ալա Մասարվան նշել է, որ Ուրիխը կապ է պահպանել Նեթանյահուի հետ հետաքննության ամենազգայուն ժամանակահատվածներում, և մատնանշել է, որ ներկա փուլում Իսրայելի վարչապետի գրասենյակ մուտք գործելու և նրա հետ շփվելու արգելքի պահանջը խնդրահարույց է։

«Ժամանակի ընթացքում [արդարադատությանը խոչընդոտելու] ռիսկը նվազում է, հատկապես հաշվի առնելով, որ դեպքերից անցել է գրեթե երկու տարի»,- ասված է դատավորի որոշման մեջ։

Այսպիսով, դատարանը վճռել է, որ Ուրիխը կարող է վերադառնալ Նեթանյահուի հետ աշխատանքին։

Յոնաթան Ուրիխին հունիսի 11-ին մեղադրանք է առաջադրվել պետական անվտանգությանը վնաս հասցնելու նպատակով գաղտնի տեղեկություն փոխանցելու համար։ Գործն առնչվում է 2024 թվականի սեպտեմբերին գերմանական Bild պարբերականին Իսրայելի ռազմական հետախուզության գաղտնի փաստաթղթի արտահոսքին։

Ըստ քննության վարկածի՝ հրապարակումը կարող էր լինել Գազայում պահվող պատանդների ազատ արձակման գործարքի շուրջ բանակցություններում Նեթանյահուի դիրքերն ուժեղացնելու փորձի մի մաս։