Թուրքիան կողմ է Հորմուզի նեղուցում նախապատերազմյան իրավիճակի վերադարձին. Ֆիդան

«Մենք ցանկանում ենք տեսնել ազատ անցում բոլոր նավերի համար, ինչպես դա կար նախքան պատերազմի սկիզբը»,-Al Jazeera-ին տված հարցազրույցում հայտարարել է Թուրքիայի արտաքին գործերի նախարար Հաքան Ֆիդանը։

Ըստ նրա՝ հենց դա է, որ «կցանկանար մեծամասնությունը»։ «Այն ստատուս քվոն, որը գոյություն ուներ նախքան պատերազմը, ձեռնտու էր բոլորին,- նշել է Ֆիդանը։-Հետևաբար, կարգավորման նոր կանոնների ներդրումը, որոնք կարող է չընդունել [երկրների] ճնշող մեծամասնությունը, կարող է դառնալ նոր հակամարտության աղբյուր, ինչը մենք չենք ուզում թույլ տալ»։

Նա Իրանին և ԱՄՆ-ին կոչ է արել «գտնելու այս խնդրի իրական լուծումը, որը շոշափում է ոչ միայն այս երկու երկրին, այլև ամբողջ աշխարհը»։ «Կարծում եմ, որ հիմա երկու կողմն էլ ունի բավարար կամք… պատերազմը կանգնեցնելու համար»,- ասել է Ֆիդանը։

«Պատերազմը հակված է էսկալացիայի, այն հանգեցնում է հետագա ողբերգությունների ու դրամաների, ինչպես նաև բացասական հետևանքների թե՛ համաշխարհային տնտեսության, թե՛ տարածաշրջանային կայունության համար։ Ընդհանուր առմամբ, մենք համարում ենք, որ երկու կողմն էլ կարող է հասնել մշտական կարգավորման»։