Ուիթքոֆը և Քուշները ժամանել են Սպիտակ տուն. CNN

ԱՄՆ հատուկ բանագնացներ Սթիվ Ուիթքոֆը և Ջարեդ Քուշները երեքշաբթի կեսօրին նկատվել են Սպիտակ տուն ժամանելիս՝ Պակիստանում հնարավոր խաղաղ բանակցություններին առնչվող անորոշության ֆոնին, հայտնում է CNN հեռուստաալիքը։

Իրանական հակամարտության հարցերով ամերիկյան երկու առանցքային բանակցողները ժամանել են արևելյան ժամանակով մոտավորապես 14:30-ին՝ Մայամիից Վաշինգտոն վերադառնալուց անմիջապես հետո։

Այս պահին պարզ չէ՝ արդյոք առաջիկա օրերին Պակիստանում տեղի կունենան ուղիղ բանակցություններ ԱՄՆ-ի և Իրանի պաշտոնյաների միջև։ Սպասվում է, որ կեսօրից հետո Սպիտակ տանը տեղի կունենան հանդիպումներ քաղաքական հարցերի շուրջ, ներառյալ՝ փոխնախագահ Ջեյ Դի Վենսի մասնակցությամբ, քանի որ վարչակազմը կշռադատում է հետագա քայլերը փխրուն հրադադարի ֆոնին, որի գործողության ժամկետն, ըստ Թրամփի, լրանում է չորեքշաբթի երեկոյան։ CNN-ի տեսախցիկները վերջին երկու ժամվա ընթացքում Սպիտակ տուն ժամանելիս արձանագրել են նաև այլ բարձրաստիճան պաշտոնյաների, մասնավորապես՝ պետքարտուղար Մարկո Ռուբիոն և պաշտպանության նախարար Փիթ Հեգսեթը։