Վրաստանի անդամակցությունը ԵՄ-ին սպառնում է լուրջ հետևանքներով. Ռուսաստանի ԱԳՆ
Վրաստանի անդամակցությունը ԵՄ-ին և Բրյուսելի հակառուսական պատժամիջոցներին հետևելը ծանր հարված կհասցնի կովկասյան հանրապետության զբոսաշրջության ոլորտին և կզրկի այն Ռուսաստանի և ԱՊՀ երկրների հետ արտոնյալ առևտրից։ Դրա մասին հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան։
«Վրաստանի անդամակցությունը Եվրամիությանը, հաշվի առնելով Բրյուսելի ապակառուցողական պահանջները, ծանր հարված կհասցնի Վրաստանի զբոսաշրջության ոլորտին և կվտանգի Վրաստանում և Ռուսաստանում ապրող ազգականների միջև հաղորդակցությունը, քանի որ նրանք կկորցնեն միմյանց բնականոն կերպով այցելելու հնարավորությունը։ Բացի դրանից, Վրաստանը ստիպված կլինի միանալ մեր երկրի դեմ էներգետիկ էմբարգոյին»,- ասել է Զախարովան։
Նա նշել է, որ Ռուսաստանը հանրապետության նավթամթերքի և բնական գազի հիմնական և հուսալի մատակարարներից մեկն է։
«Եվրամիությանը անդամակցելը կնշանակի նաև, որ Վրաստանը կկորցնի Ռուսաստանի և ԱՊՀ երկրների հետ արտոնյալ առևտրային ռեժիմը, որոնք նրա հիմնական շուկաներն են»,- հավելել է Զախարովան։
