Պուտինը Արա Աբրահամյանին պարգևատրել է «Հայրենիքին մատուցած ծառայությունների համար» 3-րդ աստիճանի շքանշանով
Ռուսաստանի նախագահ Վլադիմիր Պուտինը Հայերի միության ղեկավար Արա Աբրահամյանին պարգևատրել է «Հայրենիքին մատուցած ծառայությունների համար» 3-րդ աստիճանի շքանշանով, հաղորդում է РИА Новости-ն։
ՌԴ նախագահը չորեքշաբթի Կրեմլում հանձնել է պետական պարգևները։
Նույն պարգևները հանձնվել են նաև Ն.Ի. Պիրոգովի անվան ազգային բժշկական և վիրաբուժական կենտրոնի գլխավոր տնօրեն Օլեգ Կարպովին, Ռուսաստանի Դաշնության ժողովրդական արտիստ Եվգենի Կնյազևին և հեռուստահաղորդավար Վլադիմիր Սոլովյովին։
Պուտինը «Հայրենիքին մատուցած ծառայությունների համար» 4-րդ աստիճանի շքանշանը կհանձնի Ռուսաստանի ԱԳՆ պաշտոնական ներկայացուցիչ Մարիա Զախարովային, երաժիշտ Դենիս Մացուևին, Ա.Ն. Բակուլևի անվան սրտանոթային վիրաբուժության կենտրոնի տնօրեն Ելենա Գոլուխովային և խորհրդային հոկեյիստ Վլադիմիր Միշկինին։
Բացի դրանից, ռեժիսոր Նիկիտա Միխալկովը արժանացել է Սուրբ Անդրեաս առաքյալի շքանշանի, իսկ երաժիշտ Վլադիմիր Սպիվակովը՝ Ռուսաստանի Դաշնության Աշխատանքի հերոսի կոչման:
