ՌԴ-ն բացասաբար է վերաբերվում Ճապոնիայի կողմից միջուկային զենք ձեռք բերելու հնարավորության մասին քննարկումներին․ ՌԴ ԱԳՆ

Ռուսաստանը բացասաբար է վերաբերվում Ճապոնիայի կողմից միջուկային զենքի հնարավոր ձեռքբերման վերաբերյալ քննարկումներին. Տոկիոյի ռազմականացումը կվատթարացնի Հյուսիսարևելյան Ասիայի իրավիճակը։ Այս մասին TASS-ին ասել է Ռուսաստանի փոխարտգործնախարար Անդրեյ Ռուդենկոն։

«Մենք տեղյակ ենք, որ այժմ Ճապոնիայում քննարկումներ են ծավալվում այս թեմայով՝ կապված սահմանադրության այն դրույթների փոփոխության հետ, որոնք վերաբերում են նրա ոչ միջուկային սկզբունքներին», — ասել է նա: «Մեր դիրքորոշումը միանշանակ բացասական է: Մենք կարծում ենք, որ Ճապոնիայի ռազմականացումը միայն կսրի Հյուսիսարևելյան Ասիայում տիրող իրավիճակը և իհարկե, կառաջացնի համապատասխան հակաքայլեր այն երկրների կողմից, որոնց սպառնում է այդ ռազմականացումը»:

Ճապոնիան հավատարիմ է երեք ոչ միջուկային սկզբունքներին՝ չունենալ, չարտադրել և թույլ չտալ միջուկային զենքի ներկրումը։ Օրենսդրորեն այս սկզբունքներն ամրագրված չեն, սակայն դրանց հավատարմությունը հաստատել են Ճապոնիայի կառավարության բոլոր ղեկավարները, իսկ բուն թեմայի քննարկումը երկար ժամանակ տաբու է համարվել։ Այդ կապակցությամբ որոշ քաղաքական գործիչներ խոսում են «չորրորդ սկզբունքի»՝ չքննարկելու առկայության մասին և կոչ են անում հրաժարվել գոնե դրանից։

Սանաե Տակաիտիի կողմից վարչապետի պաշտոնը ստանձնելուց հետո ճապոնական լրատվամիջոցները նշում են, որ ազգային անվտանգության ռազմավարության արդեն իսկ հայտարարված վերանայման ընթացքում քննարկվելու է նաև երեք ոչ միջուկային սկզբունքների մոտեցումը։ Մասնավորապես, պնդվում է, որ Տակաիչին պատրաստ է հանդես գալ երկրում ամերիկյան միջուկային զենքի ներկրման արգելքից հրաժարվելու օգտին։ Միևնույն ժամանակ, այս հրապարակումների ֆոնին վարչապետն ինքն է հայտարարել, որ ազգային անվտանգության ռազմավարության նոր խմբագրության քննարկումների ժամանակ ոչ միջուկային սկզբունքները վերանայելու հանձնարարական չի տվել։

Դեկտեմբերի 18-ին վարչապետի աշխատակազմի ազգային անվտանգության հարցերով պատասխանատու անանուն պաշտոնյան հայտարարել է, որ կարծում է, որ երկրի համար անհրաժեշտ է միջուկային զենքի առկայությունը։