«Հանուն ունեցվածքի չեմ կարող հայրենիքս դավաճանել». կփակի՞ Ծառուկյանը քաղաքականության էջը
Եթե Նիկոլ Փաշինյանն ընտրություններում հաղթի, Գագիկ Ծառուկյանը կշարունակի՞ պայքարել նրա դեմ, թե՞ կոմպրոմիսի կգնա, կփրկի իր գործարանն ու տունը, որ Փաշինյանը սպառնում է վերցնել: Ընտրություններին մասնակցող գործարարը պնդում է՝ կոմպրոմիս չի լինի, իր հեղինակությունն ու հայրենիքն ավելի կարևոր են:
«Ծառուկյանը նմա՞ն է, որ հանուն ունեցվածքի ազգովի խայտառակվի, որ ուր մտնեմ, ասեմ՝ «դավաճան, իր ունեցվածքի համար սաղ ժողովրդին վարի տվեց», — ասաց Ծառուկյանը:
Վարչապետը նախընտրական պայքարը շարունակում է հիմնական ընդդիմադիր մրցակիցներին սպառնալով ունեզրկել:
«Քանի Հայաստան պետությունը կա, Գագիկ Ծառուկյանենց տները սկսելու ենք վերադարձնել ժողովրդին: Ես ասում եմ՝ մինչև 2031 թիվը Գագիկ Ծառուկյանի սարի գլխին սարքած տունը պետք է ծերերի խնամքի կենտրոն դառնա: Առաջիկայում «Արարատցեմենտ» գործարանը նույնպես՝ որպես Գուլոյան-Ծառուկյան կլանի կողմից ապօրինի յորացված գույք, կվերադարձվի Հայաստանի Հանրապետությանը», — հայտարարել է վարչապետ Փաշինյանը:
