Ռուսաստանի առաջատար սոցիոլոգիական կենտրոններն արձանագրել են․ Պուտինի վարկանիշն ընկել է
Հարցման ենթարկված ռուսաստանցիների 73 տոկոսը կարծում է, որ Վլադիմիր Պուտինը Ռուսաստանի նախագահի պաշտոնում աշխատում է «ավելի շուտ լավ», վկայում է «Հասարակական կարծիք» հիմնադրամի (ФОМ) հետազոտությունը։
Ինչպես նշում է «Ագենտստվո» պարբերականը, սա նվազագույն ցուցանիշն է 2022 թվականի փետրվարի 25-27-ից ի վեր, երբ այդ ցուցանիշը կազմում էր 71 տոկոս։
Մեկ շաբաթ առաջ ФОМ-ը հայտնել էր, որ հարցվածների 76 տոկոսը Պուտինի աշխատանքը գնահատում էր «ավելի շուտ լավ»։ Այդ ժամանակ նաև հարցվածների 74 տոկոսը հայտնել էր, որ վստահում է նրան։ Այժմ վստահության ցուցանիշը նվազել է մեկ տոկոսային կետով՝ մինչև 73 տոկոս։
Հարցվածների բաժինը, որոնք կարծում են, որ Պուտինն աշխատում է «ավելի շուտ վատ», մեկ շաբաթում աճել է երկու տոկոսային կետով՝ մինչև 13 տոկոս։ Հարցվածների 17 տոկոսը նաև հայտնել է, որ չի վստահում նախագահին։ Այս ցուցանիշը մեկ շաբաթում աճել է երեք տոկոսային կետով։
Նախօրեին անկախ «Լևադա-Կենտրոնը» հրապարակել էր իր հետազոտության արդյունքները։ Դրանցից հետևում է, որ 2026 թվականի ապրիլին Պուտինի գործունեության հավանության մակարդակը նախագահի պաշտոնում հասել է 79 տոկոսի։ Կենտրոնում նշել են, որ այդ ցուցանիշը վերջին կես տարվա ընթացքում դանդաղ նվազում է։
Հասարակական կարծիքի ուսումնասիրման համառուսաստանյան կենտրոնը (ВЦИОМ) յոթ շաբաթ անընդմեջ արձանագրել է Վլադիմիր Պուտինի վարկանիշի անկում։ Ապրիլի 24-ին հրապարակված հետազոտության արդյունքներից հետևում է, որ հարցման ենթարկված ռուսաստանցիների 24,1 տոկոսը չի վստահում Վլադիմիր Պուտինին, իսկ հարցվածների 23,3 տոկոսը չի հավանում նրա աշխատանքը։ Այսօր ВЦИОМ-ը նոր վարկանիշներ չի հրապարակել, քանի որ մայիսի 1-ը Ռուսաստանում ոչ աշխատանքային օր է։
Միևնույն ժամանակ, ինչպես հայտնի է դարձել «Մեդուզա»-ին, ռուսական իշխանություններին հավատարիմ ԶԼՄ-ներին ավելի վաղ Կրեմլում խորհուրդ էին տվել հղում անել հենց ФОМ-ի վարկանիշներին կամ ընդհանրապես չհաղորդել այս ցուցանիշների մասին։
Պուտինի վարկանիշը կտրուկ ընկել է թելեգրամի արգելափակման և բջջային ինտերնետի սահմանափակման, ինչպես նաև գների աճի և պատերազմից ռուսաստանցիների հոգնածության ֆոնին, «Մեդուզա»-ին ասել է Կրեմլի հետ համագործակցող քաղաքական տեխնոլոգը։ Ինքը՝ Պուտինը, վարկանիշի անկման ֆոնին պատգամավորներին և սենատորներին կոչ է արել «չկենտրոնանալ» միայն արգելող օրենքների վրա։
