Լիբանանի հարավում ՑԱԽԱԼ-ի և «Հըզբոլլահի» միջև բախում է տեղի ունեցել

Լիբանանի հարավում բախում է տեղի ունեցել իսրայելական բանակի (ՑԱԽԱԼ) և «Հըզբոլլահ» շարժման միջև՝ չնայած Իսրայելի և Լիբանանի միջև շարունակվող հրադադարին։

Իսրայելական բանակը հայտարարել է, որ «Հըզբոլլահը» Ռաբ-Թալատինում «մի քանի հրթիռ է արձակել ՑԱԽԱԼ-ի զինվորների ուղղությամբ», ինչին նրանք պատասխանել են հարվածով հենց այն հրթիռային կայանքին, որից իրականացվել էր արձակումը։ «Հըզբոլլահը» հաստատել է, որ Կֆար-Գիլադի բնակավայրում հարված է հասցրել իսրայելական բանակի «հրետանային դիրքին»։

Իր հայտարարության մեջ «Հըզբոլլահը» Իսրայելին մեղադրել է հրադադարի ռեժիմը ավելի քան 200 անգամ խախտելու, խաղաղ բնակիչների վրա հարձակվելու և Լիբանանի հարավում տներ ու գյուղեր ավերելու մեջ։

Ավելի վաղ Իսրայելի պաշտպանության բանակը հայտարարել էր, որ հարվածներ է հասցրել Էլ-Քուսեյրում պաշտպանության առաջնագիծը հատած և «անմիջական սպառնալիք են ներկայացրած» անձանց, որոնց նույնականացրել է որպես «ահաբեկիչների»:

Իսրայելի պաշտպանության բանակը հրադադարի պայմաններում պարբերաբար հարձակումներ է իրականացնում Լիբանանի հարավում՝ հայտարարելով, որ գործում է «իսրայելցի քաղաքացիական անձանց և զինվորների համար ցանկացած սպառնալիք վերացնելու նկատառումներով»։