Իրանը վերջնական որոշում է ընդունել չմեկնել Պակիստան՝ չորեքշաբթի ԱՄՆ-ի հետ բանակցությունների համար. Tasnim

Tasnim գործակալության տեղեկություններով՝ Իրանի որոշումը՝ չորեքշաբթի օրը չայցելել Պակիստան, վերջնականապես ընդունված է։

Չնայած լրատվամիջոցների և ամերիկյան պաշտոնյաների տարածած բոլոր լուրերին, իրանական բանակցային խումբը պակիստանցի միջնորդի միջոցով ամերիկյան կողմին տեղեկացրել է, որ տարբեր պատճառներով չորեքշաբթի օրը չի լինի Պակիստանի մայրաքաղաք Իսլամաբադում, և ներկայում բանակցություններին մասնակցելու հեռանկարներ չկան։

Համապատասխան աղբյուրները ենթադրում են, որ իրանցի բանակցողների բացակայության պատճառն այն է, որ երբ Պակիստանը ստանձնեց միջնորդությանը, և ամերիկյան կողմը հանդես եկավ հրադադարի խնդրանքով, Իրանը համաձայնեց այդ հրադադարին և հաջորդող բանակցություններին՝ փորձելով վերջ տալ պատերազմին իր ներկայացրած 10 կետից բաղկացած շրջանակի հիման վրա, որն ընդունել էր Միացյալ Նահանգները։ Պակիստանը նույնպես հատուկ հայտարարել էր ամերիկացիների կողմից այդ շրջանակի ընդունման մասին։ Սակայն դրանից անմիջապես հետո՝ հաջորդող օրերին, ամերիկյան կողմը սկսեց խախտել իր պարտավորությունները։

Ամերիկյան կողմը, լիովին խախտելով իր պարտավորությունները, հրաժարվեց իսրայելցիներին ստիպել հրադադար հաստատել Լիբանանում, և այդ քայլը մի քանի օրով լուրջ խոչընդոտներ ստեղծեց բանակցություններում։ Բացի դրանից, Իսլամաբադում բանակցությունների հենց առաջին փուլում ամերիկացիները ներկայացրել են բազմաթիվ չափազանց մեծ պահանջներ, որոնք իրականում բանակցությունների նախնական շրջանակի խախտում էին, և այդ հարցը լիովին փակուղի մտցրեց բանակցությունների առաջին փուլը։

Չնայած ռազմի դաշտում կրած անհաջողությանը՝ Միացյալ Նահանգները կարծում էր, որ կկարողանա փոխհատուցել պատերազմում կրած ձախողումը բանակցություններում չափազանց մեծ պահանջներ ներկայացնելու միջոցով։ Ընդսմին, Իսլամաբադի բանակցություններից մի քանի օր անց Միացյալ Նահանգները ստիպված եղավ հրադադար հաստատել Լիբանանում՝ Իսրայելին հրթիռային հարված հասցնելու Իրանի հստակ սպառնալիքի պատճառով։

Այդ իրադարձություններից հետո Իրանի արտգործնախարար Աբբաս Արաղչին հայտարարեց, որ Իրանը ևս կբացի Հորմուզի նեղուցը առևտրային նավերի համար՝ հրադադարի ռեժիմի նախնական պայմանների և նախապես համաձայնեցված շրջանակի հիման վրա։ Սակայն Իրանի այդ քայլին անմիջապես հետևեցին ամերիկացիների թշնամական գործողությունները՝ ուղղված Իրանի ծովային շրջափակման պահպանմանը։

Վերջին մի քանի օրվա ընթացքում փոխանակված ուղերձներում ամերիկացիները չեն նահանջել իրենց չափազանց մեծ պահանջներից, որոնք հակասում էին իրանցի ժողովրդի իրավունքներին, կողմերի միջև փոխանակված ուղերձներում որևէ նշանակալի առաջընթաց չի գրանցվել։ Այդ պատճառով Իրանն այսօր վերջապես հայտարարեց, որ նման պայմաններում (Պակիստանում) բանակցություններին մասնակցելը Թեհրանը «ժամանակի անիմաստ կորուստ» է համարում, քանի որ ԱՄՆ-ը խոչընդոտում է ցանկացած պատշաճ համաձայնության հասնելուն։ Ուստի՝ «Իրանը չի միանա ամերիկյան շոուին»։ Որոշումը հայտարարվել է այսօր պակիստանցիների միջոցով, և Իրանը չորեքշաբթի ներկա չի լինի Պակիստանում՝ սեփական ժողովրդի իրավունքները լիարժեք պաշտպանելու նպատակով։