ՌԴ-ում ուժայինները 18 մարդու են ձերբակալել՝ համացանցի արգելափակման դեմ ուղղված ակցիաների ժամանակ
Ռուսաստանի քաղաքներում մարտի 29-ին տեղի ունեցած համացանցի արգելափակման դեմ բողոքի ակցիաների ժամանակ բերման է ենթարկվել առնվազն 18 մարդ, հայտնում է «ՕՎԴ-Ինֆո»-ն։ Մասնավորապես՝ Մոսկվայում բերման է ենթարկվել 13 մարդ, Սանկտ Պետերբուրգում և Կալուգայում՝ երկուական, և մեկ հոգի՝ Վորոնեժում։ Ոստիկանության բաժիններ տեղափոխվածների թվում են չորս անչափահաս և 72-ամյա խորհրդային այլախոհ Ալեքսանդր Պոդրաբինեկը։ Մայրաքաղաքում ակցիան անցկացվել է Բոլոտնայա հրապարակում, որտեղ նախապես բերվել էին ոստիկանական և Ռոսգվարդիայի մեքենաները։ Ըստ «ՕՎԴ-Ինֆո»-ի տվյալների՝ ուժայիններն օրվա ընթացքում կանգնեցրել են առանձին մարդկանց, ստուգել փաստաթղթերը և տեղափոխել բաժիններ, որտեղ փաստաբանների մուտքն արգելվել է։
Բերման ենթարկվածներից մեկը՝ Արթուր Վագները, պատմել է, որ «Մեշչանսկի» ոստիկանական բաժանմունքում ուժայիններն իրեն ծեծի են ենթարկել և հափշտակել բանկային քարտը։ Նրանք երիտասարդին ստիպել են ցուցմունք տալ իր մորաքրոջ՝ Եկատերինա Վագների դեմ, ում հետ նա եկել էր հրապարակ։ Վերջինիս թողել են բաժնում գիշերելու՝ մեղադրելով ոստիկանությանը չենթարկվելու մեջ։ Մեկ այլ բերման ենթարկվածի՝ Վլադիսլավ Ազարոչկինին, ոստիկանները ծեծել են «Յակիմայկա» բաժնում։ Նրան սպառնացել են խոշտանգումներով և սեքսուալ բնույթի բռնությամբ, իսկ այնուհետև արձանագրություններ են կազմել՝ ոստիկանությանը չենթարկվելու և մանր խուլիգանության վերաբերյալ։ Նա գիշերն անցկացրել է բաժանմունքում։ Սանկտ Պետերբուրգում բերման ենթարկված տղամարդուն սպառնացել են վարչական արձանագրությամբ և զինվորական կոմիսարիատ ուղարկելով, սակայն հետո բաց են թողել։ Վորոնեժում բերման ենթարկվածը նույնպես ազատ է արձակվել՝ առանց արձանագրություն կազմելու։
Մարտի կեսերին TikTok-ում սկսել են տարածվել համացանցի արգելափակման դեմ ուղղված ակցիաներին մասնակցելու կոչերը։ Շատ տեսահոլովակներում առկա է եղել նախկինում անհայտ «Ալ կարապ» խմբի տարբերանշանը, որը ստեղծել է համանուն ալիք և «Միտինգ 29.03» Telegram-չաթը։ Կազմակերպիչները հայտնել են, որ Մոսկվայում և Սանկտ Պետերբուրգում հանրահավաքներ անցկացնելու հայտեր են ներկայացրել, սակայն իշխանությունները մերժել են դրանք՝ վկայակոչելով «քովիդային սահմանափակումները»։
Մարտի 29-ին Ռուսաստանի ավելի քան 20 քաղաքներում համացանցի արգելափակումների դեմ մի շարք հանրահավաքներ անցկացնելու պլանների մասին հայտարարել էր նաև քաղաքական տեխնոլոգ Դմիտրի Կիսելյովը՝ նախագահական ընտրություններում Բորիս Նադեժդինի շտաբի նախկին ղեկավարը։ Ինքը՝ Նադեժդինը, հայտնել է, որ Մոսկվայի մարզի իշխանությունները մերժել են հանրահավաքի համաձայնեցումը։ Նրա խոսքով՝ ինքը բազմաթիվ հայտեր է ներկայացրել, սակայն ոչ մի քաղաքում ակցիան չի թույլատրվել։
ՆԳՆ-ն նախազգուշացրել էր հնարավոր ձերբակալությունների և իշխանությունների հետ չհամաձայնեցված ակցիաներին մասնակցելու համար պատասխանատվության մասին։ Գերատեսչությունը հիշեցրել էր վարչական և քրեական պատասխանատվության մասին, ինչպես նաև ընդգծել, որ նման միջոցառումները «անհապաղ կկասեցվեն»։
