Ռուսաստանի և Իրանի արտգործնախարարները քննարկել են ԱՄՆ-ի և Իսրայելի հարձակումների շուրջ ստեղծված իրավիճակը
Ռուսաստանի արտգործնախարար Սերգեյ Լավրովը մարտի 3-ին հեռախոսազրույց է ունեցել Իրանի արտգործնախարար Աբբաս Արաղչիի հետ, հայտնել են Ռուսաստանի ԱԳՆ մամուլի ծառայությունից։
Ըստ մամուլի հաղորդագրության՝ կողմերը քննարկել են տարածաշրջանում տեղի ունեցող զարգացումները, որոնք առաջացել են Իրանի դեմ ԱՄՆ-ի և Իսրայելի չհրահրված զինված ագրեսիայի հետևանքով։ «Ընդգծվել է, որ նման գործողությունները խաթարում են միջազգային իրավունքի հիմնարար նորմերը և ծանր հետևանքներ են առաջացնում ամբողջ Մերձավոր Արևելքի համար։ Այդ դիրքորոշումը ՄԱԿ-ի Անվտանգության խորհրդի նիստում հստակորեն կրկնել է Ռուսաստանի ներկայացուցիչը։
Սերգեյ Լավրովը վերահաստատել է իր սկզբունքային դիրքորոշումը՝ ի նպաստ լարվածության թուլացման, ուժի կիրառումից հրաժարվելու և հակամարտության քաղաքական-դիվանագիտական կարգավորմանն անցնելու, ինչպես նաև Ռուսաստանի պատրաստակամությունը լիովին աջակցել դրան։ Ընդգծվել է նաև տարածաշրջանի բոլոր երկրներում քաղաքացիական բնակչության և քաղաքացիական ենթակառուցվածքների անվտանգությունն ապահովելուն ուղղված միջոցառումների ձեռնարկման առաջնահերթությունը»,- նշել է Ռուսաստանի ԱԳՆ-ն։
