Զելենսկին հայտնել է, որ հաջորդ շաբաթ հանդիպելու է եվրոպացի գործընկերների հետ

Ուկրաինայի նախագահ Վլադիմիր Զելենսկին իր թելեգրամ-ալիքում հայտնել է, որ հաջորդ շաբաթ հանդիպելու է եվրոպացի գործընկերների հետ։ Նա հայտարարությունն արել է Ուկրաինայի Ազգային անվտանգության եւ պաշտպանության խորհրդի քարտուղար Ռուստեմ Ումերովի հետ բանակցություններից հետո։

Պետության ղեկավարի խոսքով՝ Կիեւը «համակարգվելու է, որպեսզի Եվրոպան լինի բոլոր գործընթացներում եւ դառնա ավելի ուժեղ»։

«Ես հանձնարարել եմ Ռուստեմին ավելի շատ աշխատել Մերձավոր Արեւելքում եւ Թուրքիայում մեր բարեկամների հետ, որպեսզի այնտեղ եւս զգան իրենց ներգրավվածությունը եւ կարողանան ավելի շատ օգնել»,- գրել է Զելենսկին։

Այս շաբաթ The Wall Street Journal թերթը տեղեկացրել էր, որ Զելենսկին հրամայել է մշակել Ռուսաստանի հետ հակամարտությունը վարելու պլան եւս երեք տարով։ Պարբերականի տեղեկացմամբ՝ Ուկրաինայի նախագահը դա փաստարկել է նրանով, որ չի հավատում ՌԴ-ի հետ բանակցությունների հաջողությանը։