Բաքուն պնդում է, որ հեղաշրջման փորձի մեջ մեղադրվող Մեհտիևը կապ է պահպանել Ռուսաստանի հետ

Ադրբեջանի պետական ​​անվտանգության ծառայության այսօր հրապարակած տեսանյութը նախագահի աշխատակազմի նախկին ղեկավար Ռամիզ Մեհտիևի և անհայտ կնոջ միջև հեռախոսազրույցի հատված է պարունակում։

Զրույցի ընթացքում Ռամիզ Մեհտիևը կնոջից խորհուրդ է հարցնում՝ ինչպես փոխանցել իր պատրաստած նամակը Ադրբեջանում «պետական ​​կառավարման համակարգում փոփոխությունների» մասին, որն, ըստ էության, վերաբերում է հեղաշրջումից հետո կառավարման մոդելին։

Տեսանյութում կնոջ ինքնությունը չի բացահայտվում։

Ըստ ադրբեջանական APA-ի՝ այդ կինը, ենթադրաբար, աշխատում է Ռուսաստանի գիտությունների ակադեմիայում և միջնորդ է եղել Մեհտիևի և Ռուսաստանի ուժային կառույցների միջև կապերի հարցում։

Աղբյուրը հայտնել է, որ Մեհտիևը Ադրբեջանի ԳԱԱ նախագահի պաշտոնում աշխատելու ընթացքում (2019–2022) կապ է պահպանել «Ռուսաստանում գտնվող իր համակարգողների» հետ՝ Ռուսատանի ԳԱ-ի իրավապահ մարմինների հետախուզական ցանցի միջոցով»։

Ավելի վաղ՝ 2022 թվականի փետրվարի 19-ին, Ռամիզ Մեհտիևն ազատվել է ԱԳԱԱ-ի նախագահի պաշտոնից։ Դրանից ընդամենը երեք ամիս առաջ՝ 2021 թվականի նոյեմբերի 25-26-ը, նա Բաքվում հյուրընկալել էր Ռուսաստանի գիտությունների ակադեմիայի նախագահ Ալեքսանդր Սերգեևի գլխավորած պատվիրակությանը։ Մեհտիևն անձամբ դիմավորել է հյուրերին Հեյդար Ալիևի անվան միջազգային օդանավակայանում, իսկ ԱԳԱԱ-ում անցկացված հանդիպման ժամանակ նրան պարգևատրել են Ռուսաստանի գիտությունների ակադեմիայի հուշամեդալով։