Մոսկվան Վաշինգտոնից միջուկային փորձարկումների վերսկսման մասին Թրամփի խոսքերի պարզաբանում չի ստացել. Լավրով
Մոսկվան դեռեւս դիվանագիտական ուղիներով Վաշինգտոնից պարզաբանում չի ստացել ԱՄՆ նախագահ Դոնալդ Թրամփի միջուկային փորձարկումների վերսկսման հայտարարության վերաբերյալ: Այս մասին լրագրողներին ասել է Ռուսաստանի արտաքին գործերի նախարար Սերգեյ Լավրովը, տեղեկացրել է ՏԱՍՍ-ը։
«Ոչ, մենք դեռեւս դիվանագիտական ուղիներով որեւէ պարզաբանում չենք ստացել, թե ինչ նկատի ուներ նախագահ Դոնալդ Թրամփը՝ հայտարարելով միջուկային փորձարկումների վերսկսման մասին»,- ասել է նախարարը՝ պատասխանելով վերսկսման վերաբերյալ հարցին։
«Պարզ չէ, թե արդյոք խոսքը միջուկային զենքի կրիչների փորձարկման մասին էր, թե՞ այսպես կոչված ենթակրիտիկական փորձարկումների (այսինքն՝ փորձարկումներ, որոնք միջուկային ռեակցիա չեն առաջացնում. դրանք անցկացվում են բոլոր միջուկային պետությունների կողմից՝ իրենց միջուկային զինանոցների անվտանգությունն ու մարտունակությունը պահպանելու համար, չեն հակասում այդ պետությունների կամավոր ստանձնած պարտավորություններին եւ չեն խախտում Միջուկային փորձարկումների համապարփակ արգելման պայմանագիրը, որը դեռեւս ուժի մեջ չի մտել), կամ՝ արդյոք Դոնալդ Թրամփը իրականում խոսել է Վաշինգտոնի կողմից լիարժեք միջուկային փորձարկումները վերսկսելու մտադրության մասին»,- նշել է ռուսաստանցի նախարարը:
«Վաշինգտոնի ներկայացուցիչների մեկնաբանությունները, որոնք հայտնվել են հանրային տարածքում, ավելի շուտ ցույց են տալիս, որ նրանք ընդհանուր պատկերացում չունեն այն մասին, թե ինչ է նկատի ունեցել ԱՄՆ նախագահը»,- եզրափակել է Լավրովը։
