Սահակաշվիլին, իր դեմ նոր մեղադրանքներ առաջադրելու մտադրության առնչությամբ, դիմել է Իվանիշվիլիի շնաձկանը

Վրաստանի երրորդ նախագահ Միխեիլ Սահակաշվիլիի դեմ նոր քրեական գործը կարող է հիմնված լինել նրա անցյալ տարվա ֆեյսբուքյան գրառման վրա, որում նա իր կողմնակիցներին կոչ էր անում «սելֆի անել» իշխող «Վրացական երազանք» կուսակցության միլիարդատեր հիմնադիր Բիձինա Իվանիշվիլիի թբիլիսյան նստավայրի նախասրահում պահվող շնաձկան հետ՝ ըստ Սաակաշվիլիի ֆեյսբուքյան էջում արված գրառումից, գրել է Новости-Грузия-ն։

«Հարգելի՛ սոլոլակյան շնաձուկ, ցանկանում եմ տեղեկացնել քեզ, որ, հավանաբար քո բողոքի հիման վրա, քո տերը ևս երեք տարի է ավելացնում իմ արդեն գրեթե ցմահ բանտարկությանը, չնայած չեմ հասկանում, թե ինչու ես վիրավորվել քեզ հետ սելֆի անելու կոչով իմ գրառումից։ Իրականում, ես միայն քո հանրայնությանն էի ձգտում։

Գիտեմ, որ դու, ինչպես ես, զրկված ես ազատությունից։ Հետևաբար, խոստանում եմ քեզ, որ երբ մենք ազատագրենք երկիրը, ես քեզ կհանեմ այդ ակվարիումից և կվերադարձնեմ Ատլանտյան օվկիանոս։ Մի փոքր էլ համբերիր, իմ շնաձուկ»,- ասվում է գրառման մեջ։

«Վրացական երազանք» կուսակցության իշխանության գալուց հետո Սահակաշվիլիի դեմ հարուցված տարբեր քրեական գործերի համար նախկին նախագահն ընդհանուր առմամբ դատապարտվել է 12,5 տարվա ազատազրկման։ Այսօր հայտարարվեց, որ այս պատիժը կարող է ավելի խստացվել։ Սահակաշվիլիին մեղադրանք է առաջադրվել «սահմանադրական կարգի կամ կառավարության բռնի տապալման կոչ անելու» համար։ Դատախազությունն այսպես է որակել բանտարկված քաղաքական գործչի սոցցանցային գրառումները և նրա հեռակա դատարան ներկայանալը։

Մեղադրական եզրակացության մեջ նշվում է, որ Սաակաշվիլին համացանցում «իր կողմնակիցներին կոչ է արել գրավել կառավարական շենքերը և տապալել ռեժիմը», սակայն դատախազությունը չի նշել, թե արդյոք դա վերաբերում է շնաձկան մասին գրառմանը։ Սաակաշվիլիի խոսքով՝ քննիչները հոկտեմբերի 24-ին այս հրապարակման վերաբերյալ հարցաքննել են իրեն։