Ռուսաստանից, ԱՄՆ-ից, Հնդկաստանից, Բրազիլիայից, Չինաստանից, Իտալիայից և Կուբայից երաժիշտներ հիանալի ելույթ ունեցան «Գելենջիկ-Մոլոդոյե» ջազային փառատոնում։
Փառատոնի ոչ պաշտոնական հիմնը դարձավ Աննա Գերմանի «Սիրահարների քաղաք» ստեղծագործությունը, որը կատարեց ՌԴ ժողովրդական արտիստ և ջազ երաժիշտ Դանիիլ Կրամերի եռյակը երգչուհի Եկատերինա Գոտլիբի հետ միասին։
Իրենց ստեղծագործությունները կատարեցին բրազիլացի երգիչ և կիթառահար Ժոանդեր Սանթոսը, Չինաստանի ամենահայտնի սաքսոֆոնահարներից և վոկալիստներից մեկը՝ Ռենի Բաոն, հնդկական «Rajeev Raja Combine» անսամբլը, ինչպես նաև Կուբայի ջազային դպրոցի ներկայացուցիչ՝ հարվածային գործիքներ նվագող Նորլան Մատուրելը։
Հատուկ «Գելենջիկ-Մոլոդոյե» փառատոնի համար արտասահմանյան երաժիշտներ և ռուս սաքսոֆոնահարներ Սերգեյ Գոլովնյայի, Անդրեյ Կրասիլնիկովի և Ռոման Սոկոլովի հետ միասին համատեղ ծրագիր ներկայացրեց դաշնակահար Յակով Օկունը։ Վոկալային սոլոն կատարեց Սանդրա Ֆրակենբերգը։
«Գելենջիկում զգում եմ ինձ ինչպես տանը: Հրաշալի եղանակ, լողափեր, որոնցում զգացվում է բրազիլական վայբը։ Առաջին անգամն եմ այստեղ, և արդեն ուզում եմ այստեղ ապրել», – փառատոնի ժամանակ պատմեց բրազիլացի երգիչ և կիթառահար Ժոանդեր Սանթոսը։
«Կարծում եմ, որ Գելենջիկը արժանի է, որ այստեղ գան աշխարհի տարբեր ծայրերից երաժիշտները, ընդ որում՝ լավագույն երաժիշտները։ Երաժիշտների համար ևս շատ կարևոր է տեսնել Գելենջիկը՝ Ռուսաստանի հենց այս հատվածը։ Բեմում ելույթ են ունենում երաժիշտներ Ռուսաստանից, ԱՄՆ-ից, Չինաստանից, Բրազիլիայից, Հնդկաստանից, Իտալիայից և Կուբայի Ազատության կղզուց։ Տաղանդավոր երաժիշտների հրաշալի կազմ ունենք», – լրագրողներին պատմել է Դմիտրի Կիսելյովը։
Փառատոնի առանցքային կատարողը դարձավ «Imperialis Orchestra» կոլեկտիվը, որը հիմնադրել են սաքսոֆոնահար Տարաս Գուսարովը և պրոդյուսեր Արտեմի Մենշչիկովը։ Արտիստների երգացանկը ներառում է բոլոր ժամանակների և ուղղությունների ստեղծագործություններ՝ դասական երաժշտությունից և ջազից մինչև ժամանակակից ոճեր, այդ թվում՝ փոփ և ռոք։
Փառատոնի բոլոր արտիստները, այդ թվում՝ «Imperialis Orchestra»–ի հիմնադիր և գեղարվեստական ղեկավար Տարաս Գուսարովը, Սանդրա Ֆրակենբերգը և արտասահմանյան կատարողները, բեմ բարձրացան համատեղ իմպրովիզացիայով, որը եզրափակեց Գելենջիկում անցկացվող երաժշտական փառատոնը։
«Կարծում եմ՝ այստեղ ավելի ու ավելի շատ երաժիշտներ կգան, բեմը աստիճանաբար ավելի լավը կդառնա, և հանրության արձագանքն էլ ավելի վառ կլինի։ Հույս ունեմ, որ այստեղ կառուցվող գինու քաղաքը՝ այսպես կոչված Սպիտակ կղզին, կդառնա ոչ միայն գինու մայրաքաղաք, այլև Ռուսաստանի գինու սիրտը, իսկ ապագայում «Գելենջիկ-Մոլոդոյե» ջազ-փառատոնի համար լուրջ հարթակ կդառնա», – հավելել է Կիսելյովը։
«Գելենջիկ-Մոլոդոյե» ջազ-փառատոնը, որը ստեղծել է «Ռոսիա Սեգոդնյա» մեդիախումբը մեդիակոնտենտի արտադրության գծով առաջատար «Կարմիր քառակուսու» աջակցությամբ, առաջին անգամ անցկացվել է Գելենջիկում 2024 թվականի սեպտեմբերի 24-25-ը։ Նախագծի գաղափարական ոգեշնչողը «Ռոսիա Սեգոդնյա»-ի գործադիր տնօրեն Դմիտրի Կիսելյովն է։
