ԱՄՆ նախագահ Դոնալդ Թրամփը հուսով է, որ այս շաբաթ կամ հաջորդ շաբաթվա սկզբին հեռախոսազրույց կունենա Ռուսաստանի նախագահ Վլադիմիր Պուտինի հետ: Նրա խոսքերը մեջբերում Է ՏԱՍՍ-ը։
«Դա տեղի կունենա, — ասել է նա լրագրողներին և հավելել,– կարծում եմ՝ այս շաբաթ կամ հաջորդ շաբաթվա սկզբին»:
Նա նաև վստահեցրել է, որ հանձնառու է Ուկրաինայի հակամարտության կարգավորմանը։
ԱՄՆ նախագահը սեպտեմբերի 7-ին հայտարարել էր, որ առաջիկա օրերին ակնկալում է զրուցել Ռուսաստանի նախագահի հետ: Պուտինի հետ մոտ ապագայում զրույց ունենալու մտադրության մասին Թրամփը նաև սեպտեմբերի 4-ին էր հայտարարել:
Հիշեցնենք` Ռուսաստանի և ԱՄՆ նախագահները օգոստոսի 15-ին հանդիպեցին Ալյասկայում և քննարկեցին ուկրաինական հակամարտության կարգավորման ուղիները: Երկու առաջնորդներն էլ դրական որակեցին բանակցությունները։
