Կոռուպցիայի դեմ խոսող գործարարը լքել է երկիրը

Մայիսի 9-ին Վեն Նայսի հայկական եկեղեցու տարածքում կազմակերպված հավաքի ընթացքում գործարար և քաղաքացիական ակտիվիստ Արամ Խաչատրյանը հանդես է եկել հրապարակային ելույթով՝ անդրադառնալով Հայաստանում առկա կոռուպցիոն համակարգին, պետական պաշտոնյաների անպատժելիությանը և իր նկատմամբ տարիներ շարունակ իրականացված հետապնդումներին։ Խաչատրյանը տեսանյութում նշել է, որ իր բիզնես գործունեության ընթացքում բազմիցս բախվել է շորթման, ճնշումների և սպառնալիքների, իսկ քաղաքական ու քաղաքացիական դիրքորոշման հրապարակային արտահայտումը հանգեցրել է նոր խնդիրների՝ այդ թվում՝ ընտանիքի անդամների նկատմամբ ճնշումների։ Նրա խոսքով՝ հրապարակային խոսքից հետո իրավիճակը կտրուկ սրվել է, ինչի արդյունքում նա ստիպված է եղել լքել Հայաստանը՝ անվտանգության նկատառումներից ելնելով։ Գործարարը նշել է, որ երկրում, իր գնահատմամբ, «ոչինչ չի փոխվել», իսկ կոռուպցիայի դեմ բարձրաձայնող անձինք շարունակում են հայտնվել վտանգի տակ։ Արամ Խաչատրյանը ընդգծել է, որ իր ելույթը քաղաքական կոչ չի ունեցել, այլ նպատակ է ունեցել բարձրաձայնել հասարակական խնդիրների մասին և ուշադրություն հրավիրել մարդու իրավունքների խախտումների վրա։ Նրա խոսքով՝ ներկայումս վերադարձը Հայաստան իր համար անվտանգ չէ։