«Դիջիթեյն»-ի շուրջ հարցեր. խաղային ոլորտի խարդախություններն ու կապերը իշխանության ընտանիքի հետ

Հայաստանում գործող խաղային բիզնեսը վերջին տարիներին մշտապես գտնվում է հասարակության ուշադրության կենտրոնում։ Հատկապես մեծ աղմուկ են բարձրացրել այն ընկերությունները, որոնք զբաղվում են առցանց խաղադրույքների ու կազինոյի հարթակների մշակմամբ։ Այդպիսի ամենախոշոր ընկերություններից մեկն է «Դիջիթեյն»-ը (նախկին TotoGaming)։ «Դիջիթեյն»-ը ոչ միայն Հայաստանի շուկայում է զբաղեցնում առաջատար դիրք, այլև արտահանում է իր տեխնոլոգիական լուծումները արտասահմանյան երկրներ։ Միևնույն ժամանակ, ընկերության գործունեության շուրջ բազմիցս ծագել են սկանդալներ՝ բարձր եկամուտներ և հարկային թափանցիկության պակաս, հաճախորդների բողոքներ խաղադրույքների հաշվարկների արդարացիության վերաբերյալ և իհարկե պաշտոնյաների ու նրանց ընտանիքի անդամների ներգրավվածություն ոլորտի գործունեությանը։ Այս ընկերության վրա հանրային ուշադրությունը հատկապես սևեռվեց այն բանից հետո, երբ 2021 թվականին վարչապետ Նիկոլ Փաշինյանի դուստրը՝ Մարիամ Փաշինյանը, աշխատանքի անցավ «Դիջիթեյն»-ում։ Պաշտոնապես նրա գործունեությունը ներկայացվում էր որպես կորպորատիվ հաղորդակցության բաժնի ղեկավարում։ Ավելի ուշ լրատվամիջոցներով տեղեկություններ հայտնվեցին նրա չհիմնավորված բարձր աշխատավարձի և ընկերության կառավարման գործում նրա ունեցած ազդեցության մասին։ 2023 թվականի վերջին նոր լուրեր շրջանառվեցին, ըստ որոնց Մարիամ Փաշինյանը արդեն հանդիսանում է ոչ միայն աշխատակից, այլև ընկերության բաժնետեր։ Այս մասին մեր հարցադրումներին թե կառավարությունից, թե ընկերությունից, պաշտոնական պարզաբանումներ այդպես էլ չտրվեց։ Խաղային ոլորտի մասնագետները, որոնք տիրապետում են այս գործի բոլոր նրբություններին տեղյակ են, որ խաղադրույքների համակարգերում հաճախ արձանագրվում են հաշվարկների անհամապատասխանություններ։ Որոշ խաղադրույք կատարողներ հրապարակայնորեն բողոքել են, որ չեղարկված խաղերի դեպքում իրենց գումարները չեն վերադարձվել, կամ որ որոշ օգտատերերի թույլատրվել են սահմանվածից ավելի բարձր խաղադրույքներ կատարել ու անթույլատրելի չափի շահում ունենալ։ Օրերս մեր խմբագրություն էր զանգահարել «Դիջիթեյն» ընկերության արդեն նախկին աշխատակից Անի Կիրակոսյանը։ պարզվում է, որ նա գործի բերումով հասանելիություն է ունեցել որոշ գաղտնի տվյալների և հենց դրա շնորհիվ հայտնաբերել է մի շարք խախտումներ։

Նա մանրամասնեց, թե ինչպես 2024 թվականի նոյեմբերին Ռումինիա-Կոսովո չեղարկված խաղի համար ոչ ոքիի վրա խաղադրույք կատարած անձինք կլորիկ գումար շահեցին։ Մինչդեռ իրականում խաղն ավարտվեց խաղը չեղարկող թիմի պարտությամբ 3:0 հաշվով։ Անիի համոզմամբ այս ամենում ակտիվ ներգրավվածություն ունի Փաշինյանների ընտանիքը ի դեմս Մարիամ Փաշինյանի։Նույն աղբյուրի պնդմամբ, մեկ այլ խաղի ժամանակ, որտեղ հանդես էին գալիս Իտալական երկու հայտնի թիմեր, օգտահաշիվներից մեկը, որը աննախադեպ բարձր շահում արձանագրեց , պատկանում էր Հայաստանի առաջին տիկնոջ եղբոր՝ ԱԺ պատգամավոր Հրաչյա Հակոբյանի անվան հետ։ Երբ Անին այս մասին փորձել է խոսել ղեկավարության հետ, նրան ուշադրություն չեն դարձրել, իսկ հետո սկսել են բացահայտ սպառնալ։ «Նրանք ուղիղ ասացին, որ եթե շարունակեմ խոսել, իմ կյանքը կարող է վտանգի տակ լինել», –պատմում է Կիրակոսյանը ՝ ընկերության մենեջերների հետ զրույցի մասին։Այնուհետև արձակուրդում գտնվելով Միացյալ Նահանգներում, տեղեկացել է, որ իրեն ապօրինաբար, իբր իր դիմումի համաձայն աշխատանքից հեռացրել են ։ Դա էլ բավական չէ, նաև ընտանիքին են սպառնացել, որ եթե Անին շարունակի բարձրաձայնել իր ունեցած տեղեկությունների մասին, ապա Հայաստանում լրջագույն պրոբլեմներ կունենան։ Ուշագրավ է, որ կոռուպցիան վերացնելու և խոշոր բիզնեսը հարկելու մասին ամեն օր խոսող Նիկոլ Փաշինյանը կարծես մոռացել է այս ոլորտի մասին, որը պաշտոնական տվյալներով տարեկան տրիլիոնների շահույթ ստանում, սակայն վճարում են չնչին հարկեր։ Փաստացի ոլորտը, ըստ ամենայնի, միտումնավոր մնում է անվերահսկելի, ինչը բխում է բացառապես այս բիզնեսի տերերի շահերից։ Քանի դեռ պետական մարմինները չեն ապահովում ոլորտում վերահսկողություն և հաշվետվողականություն, հասարակության մեջ շարունակելու են մնալ կասկածները, որ խաղային ընկերությունները և իշխանության ներկայացուցիչները անտեսանելի թելերով կապված են ։